കോരിത്തരിപ്പിക്കാൻ കെ ജി എഫ് 2 വരുന്നു; ഫസ്റ്റ് ലുക്ക് പോസ്റ്റർ സോഷ്യൽ മീഡിയയിൽ കൊടുങ്കാറ്റാവുന്നു

കന്നഡ സിനിമയുടെ തലവര മാറ്റി എഴുതിയ ചിത്രം ആയിരുന്നു യാഷ് നായകനായി എത്തിയ കെ ജി എഫ് ചാപ്റ്റർ 1. പ്രശാന്ത് നീൽ സംവിധാനം ചെയ്ത ഈ ചിത്രം 200 കോടി രൂപക്ക് മുകളിൽ ആണ് നേടിയെടുത്തത്. കേരളത്തിലും വൻ തരംഗം സൃഷ്ടിച്ച ആദ്യ കന്നഡ ചിത്രമാണ് കെ ജി എഫ് ചാപ്റ്റർ 1 എന്നു പറയാം. കഴിഞ്ഞ വർഷം റീലീസ് ചെയ്ത ഈ ചിത്രത്തിന്റെ രണ്ടാം ഭാഗം അടുത്ത വർഷം റിലീസ് ചെയ്യാൻ പോവുകയാണ്. ഇപ്പോഴിതാ കെ ജി എഫ് 2 ന്റെ ഫസ്റ്റ് ലുക്ക് പോസ്റ്റർ റീലീസ് ചെയ്തു കഴിഞ്ഞു. റീലീസ് ചെയ്ത ആ നിമിഷം മുതൽ സോഷ്യൽ മീഡിയയിൽ കൊടുങ്കാറ്റായി പരക്കുകയാണ് ഈ ഫസ്റ്റ് ലുക്ക് പോസ്റ്റർ. ആരാധകരെ കോരിത്തരിപ്പിച്ച ആദ്യ ഭാഗത്തിന് ശേഷം അവരെ ത്രസിപ്പിക്കാൻ തന്നെയാണ് രണ്ടാം ഭാഗവും എത്തുന്നത് എന്ന സൂചന ഈ പോസ്റ്റർ നൽകുന്നു.

കോലാർ സ്വർണ്ണ ഖനിയുടെ പശ്ചാത്തലത്തിൽ കഥ പറയുന്ന ഈ ചിത്രത്തിൽ അധീര എന്ന വില്ലൻ ആയി എത്തുന്നത് ബോളിവുഡ് സൂപ്പർ താരം സഞ്ജയ് ദത് ആണ്. ഹോമബിൾ ഫിലിംസിന്റെ ബാനറിൽ വിജയ് കിരുഗണ്ടുർ നിർമ്മിക്കുന്ന ഈ ചിത്രത്തിന് സംഗീതം ഒരുക്കുന്നത് രവി ബസ്രുറും എഡിറ്റ് ചെയ്യുന്നത് ശ്രീകാന്തും ആണ്. കന്നഡയിൽ നിന്നുള്ള ഒരു വലിയ താര നിര തന്നെ അണിനിരക്കുന്ന ഈ ചിത്രത്തിലെ നായികാ വേഷം ചെയ്യുന്നത് ശ്രീനിധി ഷെട്ടി ആണ്. അനന്ത് നാഗും ഈ ചിത്രത്തിലെ ഒരു നിർണ്ണായക കഥാപാത്രം ആണ്.