കെ ജി എഫ് 3 ; ഒഫീഷ്യൽ അപ്‌ഡേറ്റുമായി നിർമ്മാതാക്കൾ..!

ഇന്ത്യൻ സിനിമയിലെ ഏറ്റവും വലിയ ഹിറ്റുകളിലൊന്നായി മാറിയ ചിത്രമാണ് പ്രശാന്ത് നീൽ സംവിധാനം ചെയ്ത കെ ജി എഫ് 2 . ഇതിന്റെ ആദ്യ ഭാഗം ഇരുനൂറു കോടിക്ക് മുകളിൽ കളക്ഷൻ നേടിയപ്പോൾ, രണ്ടാം ഭാഗം നേടിയത് ആയിരം കോടിക്ക് മുകളിലാണ് ബോക്സ് ഓഫീസിൽ നിന്നും വാരിയത്. ഹിന്ദി വേർഷൻ മാത്രം 400 കോടിയിലധികം നേടിയ കെ ജി എഫ് 2 ഇപ്പോൾ ആഗോള കളക്ഷനായി 1200 കോടിയോളം നേടിക്കഴിഞ്ഞു. ഇന്ത്യൻ സിനിമയിലെ ആയിരം കോടി ക്ലബിലെ നാലാമത്തെ മാത്രം ചിത്രമാണ് കന്നഡയിൽ നിന്നുണ്ടായ ഈ ബ്രഹ്മാണ്ഡ ആക്ഷൻ എന്റെർറ്റൈനെർ. കെ ജി എഫിന് ഒരു മൂന്നാം ഭാഗമുണ്ടാകുമെന്ന സൂചന രണ്ടാം ഭാഗത്തിന്റെ ക്ളൈമാക്സിൽ തന്നെ അണിയറ പ്രവർത്തകർ പുറത്തു വിട്ടിരുന്നുവെങ്കിലും അതെപ്പോൾ ഉണ്ടാകുമെന്നുള്ള കാര്യത്തിൽ വ്യക്തമായ ഒരുത്തരം നൽകിയിരുന്നില്ല. അതിനിടക്ക് ഈ ചിത്രത്തിന്റെ മൂന്നാം ഭാഗം ഒക്ടോബറിൽ ആരംഭിക്കുമെന്നു തരത്തിൽ വാർത്തകൾ വന്നു.

ഹോംബാലെ ഫിലിമ്സിന്റെ ബാനറിൽ കെ ജി എഫ് നിർമ്മിച്ച വിജയ് കിരാഗേന്ദുർ പറഞ്ഞെന്ന രീതിയിലാണ് അങ്ങനെയുള്ള റിപ്പോർട്ടുകൾ വന്നത്. ഹിറ്റ് ചിത്രത്തിന്റെ മാര്‍വല്‍ ശൈലിയിലുള്ള ഒരു ഫ്രാഞ്ചൈസി സൃഷ്ടിക്കാനാണ് അണിയറപ്രവര്‍ത്തകര്‍ പദ്ധതിയിടുന്നതെന്നും റിപ്പോർട്ടുകൾ പറഞ്ഞു. എന്നാൽ ഈ മൂന്നാം ഭാഗം ഒക്ടോബറിൽ ആരംഭിക്കില്ലായെന്നും, ചിത്രം തുടങ്ങാൻ തീരുമാനിച്ചാൽ അത് ഔദ്യോഗികമായി തന്നെ എല്ലാവരെയും അറിയിക്കുമെന്നും ഇപ്പോൾ കെ ജി എഫ് ടീം പുറത്തു വിട്ട അപ്‌ഡേറ്റ് പറയുന്നു. ഹോംബാലെ ഫിലിംസ് തന്നെ നിർമ്മിക്കുന്ന പ്രഭാസ് ചിത്രമായ സലാറിന്റെ തിരക്കിലാണിപ്പോൾ പ്രശാന്ത് നീൽ. റോക്കിങ് സ്റ്റാർ യാഷ് നായകനായെത്തിയ കെ ജി എഫ് സീരീസിൽ ശ്രീനിഥി ഷെട്ടിയാണ് നായികാ വേഷം ചെയ്തത്.