കട്ടപ്പനയിലെ ഋത്വിക്‌ റോഷൻ ടീം വീണ്ടും; ഇത്തവണ വികട കുമാരനുമായി..!

നാദിർഷ സംവിധാനം ചെയ്ത രണ്ടാമത്തെ ചിത്രമായിരുന്നു കട്ടപ്പനയിലെ ഋത്വിക്‌ റോഷൻ. ആ ചിത്രത്തിലൂടെയാണ് വിഷ്ണു ഉണ്ണികൃഷ്ണൻ നായകനായി മലയാള സിനിമയിൽ അരങ്ങേറിയത്. ബ്ലോക്ക്ബസ്റ്റർ വിജയം നേടിയ ആ ചിത്രത്തിൽ ഏറ്റവും കൂടുതൽ കയ്യടി നേടിയത് വിഷ്ണു ഉണ്ണികൃഷ്ണൻ- ധർമജൻ ബോൾഗാട്ടി ടീമിന്റെ കോമഡി നമ്പറുകൾ ആയിരുന്നു. ഇപ്പോഴിതാ അവർ രണ്ടു പേരും ഒരിക്കൽ കൂടി ഒരുമിച്ചു പ്രേക്ഷകരുടെ മുന്നിലേക്ക് എത്തുകയാണ്. പ്രശസ്ത സംവിധായകനായ ബോബൻ സാമുവൽ ഒരുക്കിയ വികട കുമാരൻ എന്ന ചിത്രത്തിലൂടെയാണ് ഈ കൂട്ടുകെട്ട് വീണ്ടും എത്തുന്നത്. ജനപ്രിയൻ, റോമൻസ്, ഹാപ്പി ജേർണി , ഷാജഹാനും പരീക്കുട്ടിയും എന്നിവയൊക്കെ ആണ് ബോബൻ സാമുവൽ നമ്മുക്ക് തന്നിട്ടുള്ള ചിത്രങ്ങൾ. ഇപ്പോൾ പോസ്റ്റ്- പ്രൊഡക്ഷൻ സ്റ്റേജിൽ ഉള്ള വികട കുമാരൻ, അധികം വൈകാതെ തന്നെ തീയേറ്ററുകളിൽ എത്തും.

ബ്രില്ലിയൻറ് ഇഡിയറ്റ് എന്നാണ് ഈ ചിത്രത്തിന്റെ ടാഗ്‌ലൈൻ. പ്രേക്ഷകരെ ഒരുപാട് പൊട്ടിച്ചിരിപ്പിക്കുന്ന ഒരു കമ്പ്ലീറ്റ് എന്റെർറ്റൈനെർ ആയാണ് ഈ ചിത്രവും ഒരുക്കിയിരിക്കുന്നത്. വൈ വി രാജേഷ് തിരക്കഥ ഒരുക്കിയിരിക്കുന്ന ഈ ചിത്രം നിർമ്മിച്ചിരിക്കുന്നത് ചാന്ദ് വി ക്രീയേഷന്സിന്റെ ബാനറിൽ അരുൺ ഘോഷ്, ബിജോയ് ചന്ദ്രൻ എന്നിവർ ചേർന്നാണ്. കാറ്റ് എന്ന ചിത്രത്തിലൂടെ ശ്രദ്ധ നേടിയ മാനസ്സ രാധാകൃഷ്ണൻ നായികാ വേഷത്തിൽ എത്തുന്ന ഈ ചിത്രത്തിൽ സലിം കുമാർ, ഇന്ദ്രൻസ്, ബൈജു, ജിനു ജോസ്, സുനിൽ സുഗത, ദേവിക നമ്പ്യാർ, പാർവതി നായർ, ശ്രീലക്ഷ്മി ഗീതാനന്ദൻ, സീമ ജി നായർ എന്നിവരും നിർണ്ണായക വേഷങ്ങളിൽ എത്തുന്നു. അജയ് ഡേവിഡ് കാച്ചപ്പിള്ളി ദൃശ്യങ്ങൾ ഒരുക്കിയ ഈ ചിത്രത്തിന് സംഗീതം നൽകിയിരിക്കുന്നത് രാഹുൽ രാജ് ആണ്. അതുപോലെ തന്നെ ദീപു ജോസഫ് ആണ് ഈ ചിത്രത്തിന്റെ എഡിറ്റിംഗ് നിർവഹിക്കുന്നത്.