വിക്രത്തിന്റെ മഹാവിജയം; ഇത്രയും പണം എന്തുചെയ്യും; കമൽ ഹാസന്റെ മറുപടി ശ്രദ്ധ നേടുന്നു

ഒരു വലിയ ഇടവേളക്കു ശേഷമാണു ബോക്സ് ഓഫീസിൽ തരംഗമായി മാറിയ ഒരു കമൽ ഹാസൻ ചിത്രം പുറത്തു വന്നത്. ലോകേഷ് കനകരാജ് സംവിധാനം ചെയ്ത വിക്രമെന്ന ചിത്രം തമിഴിലെ ഇൻഡസ്ട്രി ഹിറ്റായി മാറുമ്പോൾ കമൽ ഹാസൻ എന്ന സൂപ്പർ താരത്തിന്റെ കിടിലൻ തിരിച്ചു വരവ് കൂടിയാണ് പ്രേക്ഷകർക്ക് കാണാൻ സാധിക്കുന്നത്. ലോകേഷും രത്‌നകുമാറും ചേർന്ന് രചിച്ച ഈ ചിത്രം നിർമ്മിച്ചിരിക്കുന്നതും കമൽ ഹാസനാണ്. രാജ് കമൽ ഫിലിംസ് ഇന്റർനാഷനലിന്റെ ബാനറിൽ അദ്ദേഹം നിർമ്മിച്ച ഈ ചിത്രം ഇപ്പോൾ ആഗോള ഗ്രോസ് മുന്നൂറു കോടിയും കടന്നു കുതിക്കുകയാണ്. ഇത്രയും വലിയ വിജയം നേടിയതിനെ കുറിച്ചു കമൽ ഹാസൻ പറയുന്ന വാക്കുകളാണ് ഇപ്പോൾ വൈറലായി മാറുന്നത്. തന്റെ എല്ലാ കടങ്ങളും തിരിച്ചടയ്ക്കും, മനസ്സിന് ഇഷ്ടമുള്ളത് കഴിക്കും എന്നാണ് ഇതിനെ കുറിച്ചു കമൽ ഹാസൻ പറഞ്ഞത്.

തന്റെ കുടുംബത്തിനും സുഹൃത്തുക്കൾക്കും കഴിയുന്നതെല്ലാം താൻ നൽകുമെന്നും, വലിയ ആളാവുക എന്നതിലുപരി നല്ല മനുഷ്യനാകുക എന്ന് മാത്രമേ തനിക്കുള്ളൂ എന്നും അദ്ദേഹം കൂട്ടിച്ചേർക്കുന്നു. ചെന്നൈയിൽ വെച്ച് ഒരു രക്തദാന ക്യാമ്പിൽ പത്രമാധ്യമങ്ങളോട് സംസാരിക്കവെയാണ് അദ്ദേഹം വിക്രത്തിന്റെ വിജയത്തെ കുറിച്ചു മനസ്സ് തുറന്നത്. ഒറ്റയടിക്ക് മുന്നൂറ് കോടി സമ്പാദിക്കാമെന്നു താൻ പറഞ്ഞപ്പോൾ ആർക്കും മനസ്സിലായില്ലെന്നും, ഇപ്പോൾ എങ്ങനെയാണു അത് വരുന്നതെന്ന് നിങ്ങൾക്ക്‌ കാണാമെന്നും വിക്രത്തിന്റെ കളക്ഷൻ മുൻനിർത്തി കമൽ ഹാസൻ പറയുന്നു. വിജയ് സേതുപതി, ഫഹദ് ഫാസിൽ, സൂര്യ, നരെയ്ൻ, കാളിദാസ് ജയറാം, ചെമ്പൻ വിനോദ് എന്നിവരും ഈ ചിത്രത്തിൻറെ താരനിരയിലുണ്ട്. 1986 ഇൽ റിലീസ് ചെയ്ത വിക്രമെന്ന കമൽ ഹാസൻ ചിത്രത്തിലെ കമൽ ഹാസൻ അവതരിപ്പിച്ച കഥാപത്രത്തിന്റെ ഒരു തിരിച്ചുവരവാണ് ഈ പുതിയ ചിത്രം.