മോഹൻലാലിനും മധുവിനുമൊപ്പം മരക്കാർ ആവാൻ അമിതാബ് ബച്ചനും കമൽ ഹാസനും?

കമ്പ്ലീറ്റ് ആക്ടർ മോഹൻലാലിനെ നായകനാക്കി മാസ്റ്റർ ഡയറക്ടർ പ്രിയദർശൻ ഒരുക്കാൻ പോകുന്ന മരക്കാർ: അറബിക്കടലിന്റെ സിംഹത്തിന്റെ കാസ്റ്റിംഗ് പൂർത്തിയായി വരികയാണ്. അതിന്റെ ഭാഗമായി ഇന്ന് ചിത്രത്തിലെ മറ്റൊരു താരത്തിന്റെ പേര് കൂടി പുറത്തു വിട്ടു. കുഞ്ഞാലി മരക്കാർ നാലാമന്റെ കഥയാണ് ഈ ചിത്രം പറയാൻ പോകുന്നത്. കുഞ്ഞാലി മരക്കാർ നാലാമൻ ആയി മോഹൻലാൽ എത്തുമ്പോൾ കുഞ്ഞാലി മരക്കാർ ഒന്നാമൻ ആയി എത്താൻ പോകുന്നത് മലയാളത്തിലെ ഏറ്റവും സീനിയർ ആയ നടന്മാരിലൊരാളായ മധു ആണ്. ഒരുപാട് സൂപ്പർ വിജയം നേടിയ ചിത്രങ്ങളിൽ ഒരുമിച്ചിട്ടുള്ള മോഹൻലാൽ- മധു ടീം ഈ ചിത്രത്തിലൂടെ ഒരിക്കൽ കൂടി വെള്ളിത്തിരയിൽ എത്തുകയാണ്.

മധുവിനെ കൂടാതെ കുഞ്ഞാലി മരക്കാർ രണ്ടാമനും മൂന്നാമനും വേണ്ടിയുള്ള താരനിർണ്ണയവും പുരോഗമിക്കുകയാണ്. ഈ കഥാപാത്രങ്ങളെ അവതരിപ്പിക്കാൻ തമിഴിൽ നിന്ന് കമല ഹാസനെയും ഹിന്ദിയിൽ നിന്ന് അമിതാബ് ബച്ചനെയുമാണ് സമീപിച്ചിരിക്കുന്നതെന്നാണ് അനൗദ്യോഗിക വിവരങ്ങൾ പറയുന്നത്. ബോളിവുഡിൽ നിന്ന് സുനിൽ സുനിൽ ഷെട്ടി, പരേഷ് റാവൽ എന്നിവരും തെലുങ്കിൽ നിന്ന് നാഗാർജുനയും ഈ ചിത്രത്തിന്റെ താര നിരയുടെ ഭാഗമാവുമെന്നും സൂചനയുണ്ട്.

നവംബറില്‍ ഷൂട്ടിങ് തുടങ്ങണം എന്നുള്ളതിനാല്‍ എത്രയും പെട്ടെന്ന് കാസ്റ്റിങ് പൂര്‍ത്തിയാക്കാനാണ് അണിയറപ്രവർത്തകരുടെ ശ്രമം. നൂറു കോടി മുതൽ മുടക്കിൽ നിർമ്മിക്കുന്ന ഈ ചിത്രത്തിന് തിരക്കഥ ഒരുക്കിയതും പ്രിയദർശൻ തന്നെയാണ്. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മ്മിക്കുന്നത്. സഹനിർമ്മാതാക്കളായി മൂൺ ഷോട്ട് എന്റർടൈൻമെന്റ് ഉടമ സന്തോഷ് ടി കുരുവിളയും കോൺഫിഡന്റ് ഗ്രൂപ്പ് ചെയർമാൻ ഡോക്ടർ സി ജെ റോയിയും ഈ ചിത്രത്തിന്റെ ഭാഗമാകും. പ്രൊജക്റ്റ് ഡിസൈനർ ആയി സാബു സിറിലും ക്യാമറാമാൻ ആയി എസ് തിരുവും ആണ് ഈ പ്രിയദർശൻ- മോഹൻലാൽ ചിത്രത്തിന്റെ ഭാഗമാവുന്നതു എന്നും റിപ്പോർട്ടുകൾ ഉണ്ട്.