വ്‌ളോഗർ ബീവാത്തുവിന് ശേഷം വീണ്ടും ബ്ലോക്ക്ബസ്റ്ററടിക്കാൻ കല്യാണി പ്രിയദർശൻ; ശേഷം മൈക്കിൽ ഫാത്തിമ വരുന്നു

ഈ വർഷം രണ്ടു ബ്ലോക്ക്ബസ്റ്റർ ചിത്രങ്ങളിൽ നായികാ വേഷം ചെയ്ത നടിയാണ് കല്യാണി പ്രിയദർശൻ. പ്രണവ് മോഹൻലാൽ നായകനായ വിനീത് ശ്രീനിവാസൻ ചിത്രം ഹൃദയവും, ടോവിനോ തോമസ് നായകനായ ഖാലിദ് റഹ്മാൻ ചിത്രം തല്ലുമാലയുമാണ് ആ ചിത്രങ്ങൾ. തുടർച്ചയായി വമ്പൻ വിജയ ചിത്രങ്ങൾ നൽകുന്ന കല്യാണിയുടെ ഏറ്റവും പുതിയ ചിത്രവും ഇപ്പോൾ പ്രഖ്യാപിച്ചിരിക്കുകയാണ്. ശേഷം മൈക്കിൽ ഫാത്തിമ എന്ന് പേരിട്ടിരിക്കുന്ന ഈ ചിത്രത്തിന്റെ ടൈറ്റിൽ പോസ്റ്റർ പുറത്തു വിട്ടത് യുവ സൂപ്പർ താരം പൃഥ്വിരാജ് സുകുമാരനാണ്. നവാഗതനായ മനു സി കുമാറാണ് ഈ ചിത്രം തിരക്കഥയെഴുതി സംവിധാനം ചെയ്തിരിക്കുന്നത്. പൃഥ്വിരാജ് സുകുമാരനൊപ്പം ടോവിനോ തോമസും ഈ ചിത്രത്തിന്റെ ടൈറ്റിൽ പോസ്റ്റർ സോഷ്യൽ മീഡിയ വഴി പങ്കു വെച്ചിട്ടുണ്ട്.

ദി റൂട്ട്, പാഷൻ സ്റ്റുഡിയോസ് എന്നിവയുടെ ബാനറിൽ ജഗദീഷ് പളനിസ്വാമി, സുധൻ സുന്ദരം എന്നിവർ ചേർന്നാണ് ഈ ചിത്രം നിർമ്മിക്കുന്നത്. ഹൃദയം എന്ന ചിത്രത്തിലെ ബ്ലോക്ക്ബസ്റ്റർ ഗാനങ്ങളിലൂടെ ശ്രദ്ധ നേടിയ ഹിഷാം അബ്ദുൽ വഹാബാണ് ഈ ചിത്രത്തിന് വേണ്ടി സംഗീതമൊരുക്കുന്നത്. സന്താന കൃഷ്ണൻ ഛായാഗ്രാഹകനായി എത്തുന്ന ഈ ചിത്രത്തിന്റ എഡിറ്റിംഗ് നിർവഹിക്കുന്നതു കിരൺ ദാസാണ്. ഈ ചിത്രത്തിലെ മറ്റു താരങ്ങളെ കുറിച്ചുള്ള വിവരങ്ങൾ അധികം വൈകാതെ തന്നെ പുറത്തു വരുമെന്നാണ് സൂചന. വരനെ ആവശ്യമുണ്ട് എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച കല്യാണി പ്രിയദർശൻ, അതിനു ശേഷം മരക്കാർ അറബിക്കടലിന്റെ സിംഹമെന്ന ചിത്രത്തിൽ അതിഥി വേഷവും ചെയ്തിരുന്നു. മോഹൻലാൽ- പൃഥ്വിരാജ് ടീമിന്റെ സൂപ്പർ ഹിറ്റ് ചിത്രം ബ്രോ ഡാഡിയിലും നായികാ വേഷം ചെയ്തത് കല്യാണിയാണ്.