പൂമരം ക്രിസ്മസിന് ഇല്ല, റിലീസ് അടുത്ത വർഷം

പ്രശസ്ത സംവിധായകൻ എബ്രിഡ് ഷൈൻ സംവിധാനം ചെയ്യുന്ന പൂമരം മലയാള സിനിമ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ്. ജയറാമിന്റെ മകൻ കാളിദാസ് ജയറാം മലയാളത്തിൽ ആദ്യമായി നായകനായി എത്തുന്ന സിനിമയാണ് പൂമരം.

2016 സപ്തംബറിൽ ചിത്രീകരണം ആരംഭിച്ച പൂമരം വിവിധ ഷെഡ്യൂളുകളായി മഹാരാജാസ് കോളേജിലും പരിസരങ്ങളിലുമാണ് ചിത്രീകരിച്ചിരുന്നത്. ഒരു വർഷത്തോളം നീണ്ടുനിന്ന ചിത്രീകരണത്തിന് ശേഷം ചിത്രം ഇപ്പോൾ പോസ്റ്റ് പ്രൊഡക്ഷൻ സ്റ്റേജിലാണ്.

1983, ആക്ഷൻ ഹീറോ ബിജു എന്നീ സിനിമകൾക്ക് ശേഷം എബ്രിഡ് ഷൈൻ സംവിധാനം ചെയ്യുന്ന സിനിമയായതിനാൽ പ്രേക്ഷകർ ഏറെ പ്രതീക്ഷയോടെയാണ് പൂമരത്തിന് വേണ്ടി കാത്തിരിക്കുന്നത്.

ഈ വർഷം ക്രിസ്മസിന് ചിത്രം തീയേറ്ററിലെത്തും എന്ന് നടൻ ജയറാം പറഞ്ഞിരുന്നു. എന്നാൽ ചിത്രത്തിന്റെ റിലീസ് ഈ വർഷം ഉണ്ടായില്ല എന്നതാണ് സിനിമാലോകത്തു നിന്ന് ലഭിക്കുന്ന പുതിയ വാർത്ത. അടുത്ത വർഷം ആദ്യത്തോടെ പൂമരം തിയേറ്ററിലെത്തിക്കാനാണ് അണിയറപ്രവർത്തകർ ശ്രമിക്കുന്നത്.