സുഖമാണോ ദാവീദേ തമിഴിലേക്കും; തമിഴ് പതിപ്പിൽ കാക്കമുട്ടയിലെ താരം ..!

ഇരട്ട സംവിധായകരായ അനുപ് ചന്ദ്രൻ- രാജ മോഹൻ ടീം ഒരുക്കി കേരളത്തിൽ കഴിഞ്ഞയാഴ്ച പ്രദർശനത്തിനെത്തിയ ചിത്രമാണ് സുഖമാണോ ദാവീദേ. ഭഗത് മാനുവൽ , മാസ്റ്റർ ചേതൻ ജയലാൽ എന്നിവർ അഭിനയിച്ച ഈ ചിത്രം പ്രേക്ഷകരുടെയും നിരൂപകരുടെയും പ്രശംസ ഒരുപോലെ നേടിയെടുത്തു കൊണ്ട് മുന്നേറുകയാണ്. ഒരു ഫീൽ ഗുഡ് എന്റെർറ്റൈനെർ എന്ന നിലയിലും കാലിക പ്രസക്തിയുള്ള ഒരു വിഷയം പറയുന്ന ചിത്രം എന്ന നിലയിലും സുഖമാണോ ദാവീദേ ശ്രദ്ധ നേടുകയാണ്. കുട്ടികൾ വഴി തെറ്റി പോകുന്നതിനെ കുറിച്ചും അവരെ നേരായ വഴിയിലേക്ക് നയിക്കുന്നത് എങ്ങനെയെന്നും വളരെ രസകരമായി ഈ ചിത്രത്തിലൂടെ പറയുന്നു. കൃഷ്ണ പൂജപ്പുരയാണ് ഈ ചിത്രത്തിന് തിരക്കഥ രചിച്ചിരിക്കുന്നത്. പാപ്പി ക്രീയേഷന്സിന്റെ ബാനറിൽ ടോമി കിരിയന്തൻ നിർമ്മിച്ചിരിക്കുന്ന ഈ ചിത്രം ഇപ്പോൾ തമിഴിലേക്കും പോവുകയാണ്.

ഈ ചിത്രത്തിന്റെ തമിഴ് പതിപ്പിൽ കേന്ദ്ര കഥാപാത്രം ആയെത്തുന്നത് കാക്കമുട്ടൈ എന്ന തമിഴ് ചിത്രത്തിൽ അഭിനയിച്ച താരം ആണെന്നാണ് റിപ്പോർട്ടുകൾ പറയുന്നത്. എം മണികണ്ഠൻ സംവിധാനം ചെയ്ത കാക്കമുട്ടൈ 2015 ഇൽ ആണ് റിലീസ് ചെയ്തത്. ധനുഷ് നിർമ്മിച്ച ഈ സിനിമയിൽ വിഘ്‌നേശ്, രമേശ് എന്നീ ബാലതാരങ്ങൾ ആണ് കേന്ദ്ര കഥാപാത്രങ്ങളെ അവതരിപ്പിച്ചത്. ഐശ്വര്യ രാജേഷും ഈ ചിത്രത്തിൽ പ്രധാന കഥാപാത്രത്തെ അവതരിപ്പിച്ചിരുന്നു. ഏതായാലും തമിഴിൽ നിന്ന് വരെ സുഖമാണോ ദാവീദിന് ആവശ്യക്കാർ എത്തിയത് ഈ ചിത്രത്തിന്റെ മികച്ച കലാമൂല്യം കൊണ്ട് തന്നെയാണ്. ഫാമിലി ആയി തന്നെ പോയി, അധ്യാപകരും രക്ഷിതാക്കളുമെല്ലാം കുട്ടികളെ കൊണ്ട് കാണിക്കേണ്ട ചിത്രമാണ് സുഖമാണോ ദാവീദേ എന്നാണ് ഡോക്ടർ ബിനോയ് സക്കറിയ എന്ന പ്ലസ് ടു അധ്യാപകൻ അഭിപ്രായപ്പെട്ടത്‌.