തിലകനിൽ കണ്ട പ്രതിഭ ആ നടനിലും കാണാൻ സാധിക്കുന്നുണ്ട് എന്നു ജോഷി..!

മലയാള സിനിമയുടെ പെരുന്തച്ചൻ എന്ന് സിനിമാ പ്രേമികൾ ആദരവോടെ വിളിച്ച നടൻ ആണ് തിലകൻ. ആ മഹാനടൻ കാലയവനികക്കുള്ളിൽ മറഞ്ഞിട്ട് വർഷങ്ങൾ കഴിഞ്ഞു എങ്കിലും ഇന്നും ജനഹൃദയങ്ങളിൽ തിലകൻ നിറഞ്ഞു നിൽക്കുന്നു. അദ്ദേഹം അഭിനയിച്ചു പൂർണ്ണതയിൽ എത്തിച്ച അനേകം കഥാപാത്രങ്ങൾ പ്രേക്ഷകരുടെ മനസ്സിൽ എന്നും തിളങ്ങി നിൽക്കും എന്നുറപ്പാണ്. ഇപ്പോഴിതാ തിലകനിൽ കണ്ട ആ പ്രതിഭ പുതുതലമുറയിലെ ഒരു നടനിൽ താൻ കാണുന്നുവെന്ന് പറയുകയാണ് മലയാള സിനിമയുടെ മാസ്റ്റർ ഡയറക്ടർ ആയ ജോഷി. പ്രശസ്ത നടൻ ചെമ്പൻ വിനോദിനെ കുറിച്ചാണ് ജോഷി ഇപ്രകാരം അഭിപ്രായം പ്രകടിപ്പിച്ചത്.

ജോഷിയുടെ വാക്കുകൾ ഇങ്ങനെ, “ഒരു സിനിമയെപ്പറ്റി നന്നായി മനസിലാക്കിയ ശേഷമേ ചെമ്പൻ വിനോദ് അഭിനയിക്കുകയുള്ളു. അതൊരു നല്ല നടന്റെ ലക്ഷണമാണ്. തിലകനിൽ കണ്ട പ്രതിഭ ചെമ്പൻ വിനോദിൽ എനിക്ക് കാണാൻ സാധിക്കുന്നുണ്ട്”. ജോജു ജോർജ്, ചെമ്പൻ വിനോദ്, നൈല ഉഷ എന്നിവരെ കേന്ദ്ര കഥാപാത്രങ്ങൾ ആക്കി ജോഷി ഒരുക്കിയ പൊറിഞ്ചു മറിയം ജോസ് എന്ന ചിത്രം ആഗസ്റ്റ് 15 ന് റീലീസ് ചെയ്യാൻ പോവുകയാണ്. വരുന്ന രണ്ടാം തീയതി ഈ ചിത്രത്തിന്റെ ട്രൈലെർ ലോഞ്ച് ലുലു മാളിൽ വെച്ചു കംപ്ലീറ്റ് ആക്ടർ മോഹൻലാൽ നിർവഹിക്കും. പുത്തൻ പള്ളി ജോസ് എന്ന കഥാപാത്രം ആയാണ് ചെമ്പൻ വിനോദ് ഈ ചിത്രത്തിൽ എത്തുന്നത്. കാട്ടാളൻ പൊറിഞ്ചു ആയി ജോജു ജോർജും ആലപ്പാട്ട് മറിയം ആയി നൈല ഉഷയും എത്തുന്ന ഈ ചിത്രത്തിന്റെ തിരക്കഥ രചിച്ചത് അഭിലാഷ് എൻ ചന്ദ്രൻ ആണ്.