ജോജു ജോർജിന്റെ ഒറ്റക്കൊരു കാമുകൻ റിലീസിന് ഒരുങ്ങുന്നു..!

അജിൻ ലാൽ , ജയൻ വന്നേരി എന്നിവർ ചേർന്ന് സംവിധാനം ചെയ്ത ഒറ്റക്കൊരു കാമുകൻ എന്ന ചിത്രം റിലീസിന് ഒരുങ്ങുകയാണ്. ജോജു ജോർജ്, ഷൈൻ ടോം ചാക്കോ, ഭഗത് മാനുവൽ, ഷഹീൻ സിദ്ദിഖ്, വിജയ രാഘവൻ, കലാഭവൻ ഷാജോൺ , ശാലു റഹിം എന്നിവർ പ്രധാന വേഷങ്ങളിൽ എത്തുന്ന ഈ ചിത്രത്തിലെ നിർണ്ണായക സ്ത്രീ കഥാപാത്രങ്ങൾക്ക് ജീവൻ നൽകുന്നത് അഭിരാമി, ലിജോ മോൾ ജോസ് എന്നിവരാണ്. ഇറോസ് ഇന്റർനാഷണൽ കേരളത്തിൽ വിതരണം ചെയ്യുന്ന ഈ ചിത്രം നിർമ്മിച്ചിരിക്കുന്നത് ഡാസ്ലിങ് മൂവി ലാൻഡ് പ്രൊഡക്ഷൻസിന്റെ ബാനറിൽ പ്രിൻസ് ഗ്ലെറിയൻസ്, സാജൻ യശോധരൻ, അനൂപ് ചന്ദ്രൻ എന്നിവർ ചേർന്നാണ്.

ഈ ചിത്രത്തിന് കഥയും തിരക്കഥയും സംഭാഷണവും രചിച്ചിരിക്കുന്നത് എസ് കെ സുധീഷ്, ശ്രീശേഖർ എന്നിവർ ചേർന്നാണ്. സഞ്ജയ് ഹാരിസ് കാമറ ചലിപ്പിച്ച ഈ ചിത്രത്തിന് സംഗീതം പകർന്നിരിക്കുന്നത്‌ വിഷ്ണു മോഹൻ സിത്താരയാണ്. സനൽ രാജ് ആണ് ഒറ്റക്കൊരു കാമുകൻ എന്ന ഈ ചിത്രം എഡിറ്റ് ചെയ്തിരിക്കുന്നത്. ഒരു ഫാമിലി എന്റെർറ്റൈനെർ ആയി ഒരുക്കിയിരിക്കുന്ന ഈ കൊച്ചു ചിത്രം ഉടനെ തന്നെ തീയേറ്ററുകളിൽ എത്തുമെന്നാണ് റിപ്പോർട്ടുകൾ സൂചിപ്പിക്കുന്നത്. നടനും നിർമ്മാതാവുമായ ജോജു ജോർജിന്റെ സാന്നിധ്യം തന്നെയാണ് ഈ ചിത്രത്തെ ശ്രദ്ധേയമാക്കുന്നത്. ഒരു വലിയ താര നിര തന്നെ അണിനിരന്നിട്ടുള്ള ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ സോഷ്യൽ മീഡിയയുടെ ശ്രദ്ധ നേടിയിരുന്നു.

ഇറോസ് ഇന്റർനാഷണൽ പോലെ ഒരു വമ്പൻ ബാനർ വിതരണത്തിന് എടുത്തതോടെ തന്നെ ഒറ്റക്കൊരു കാമുകൻ എന്ന ചിത്രത്തെ കുറിച്ചുള്ള പ്രതീക്ഷ വർധിച്ചിട്ടുണ്ട് എന്നുറപ്പാണ്.