ഇരട്ടകളെ ഏറ്റെടുത്ത് മലയാളി പ്രേക്ഷകർ; ഹൗസ്ഫുൾ ഷോകളുമായി കളം നിറഞ്ഞ് ജോജു ജോർജ് ചിത്രം

നവാഗതനായ രോഹിത് എം.ജി. കൃഷ്ണൻ സംവിധാനം ചെയ്ത ഇരട്ട എന്ന ചിത്രം ഇപ്പോൾ വലിയ പ്രേക്ഷക പിന്തുണയോടെ പ്രദർശനം തുടരുകയാണ്. ജോജു ജോർജ് കരിയറിൽ ആദ്യമായി ഇരട്ട വേഷത്തിലെത്തിയ ഈ ചിത്രം രചിച്ചത് സംവിധായകനും, മാർട്ടിൻ പ്രക്കാട്ട്, സൂരജ്, നീരജ് എന്നിവരും ചേർന്നാണ്. ഒരേ സമയം പ്രേക്ഷകരെ ആകാംഷാഭരിതരാക്കിയും റിയലിസ്റ്റിക്കായും മുന്നോട്ടു സഞ്ചരിക്കുന്ന ഈ ചിത്രം, ജോജു ജോർജിന്റെ ഉടമസ്ഥതയിലുള്ള അപ്പു പാത്തു പാപ്പു പ്രൊഡക്ഷൻസും മാർട്ടിൻ പ്രക്കാട്ട് ഫിലിംസും സിജോ വടക്കനും ചേർന്നാണ് നിർമ്മിച്ചിരിക്കുന്നത്. ഡി.വൈ.എസ്.പി പ്രമോദ് കുമാർ, ഇയാളുടെ ഇരട്ടസഹോദരൻ എ.എസ്.ഐ വിനോദ് കുമാർ എന്നിവരുടെ ജീവിതമാണ് ഇരട്ടയിലൂടെ പ്രേക്ഷകരുടെ മുന്നിലെത്തിച്ചിരിക്കുന്നത്. പ്രേക്ഷകരും നിരൂപകരും ഗംഭീര പ്രതികരണം നൽകുന്ന ഈ ചിത്രത്തിന് കേരളത്തിലുടനീളം ഹൗസ്ഫുൾ ഷോകളാണ് ലഭിക്കുന്നത്.

ഇരട്ട കഥാപാത്രങ്ങളായി ജോജു ജോർജ് നടത്തിയ ഞെട്ടിക്കുന്ന പ്രകടനം തന്നെയാണ് ഈ ചിത്രത്തിന്റെ നട്ടെല്ല്. ഒരേ രൂപത്തിൽ, എന്നാൽ വ്യത്യസ്ത ഭാവങ്ങളിൽ ജോജു ജോർജ് കാഴ്ചവെച്ചിരിക്കുന്ന പ്രകടനത്തോടൊപ്പം, തീർത്തും അപ്രതീക്ഷിതമായ ഒരു ക്ളൈമാക്‌സും കൂടി ചേർന്നപ്പോൾ ഈ ഇമോഷണൽ ക്രൈം ഡ്രാമ മലയാള സിനിമാ പ്രേമികൾക്ക് മുന്നിലെത്തിച്ചത് ഇതുവരെ കാണാത്ത ഒരു സിനിമാനുഭവമാണ്. വൈകാരികമായി പ്രേക്ഷകനെ അത്രയധികം സ്വാധീനിക്കുന്ന ചിത്രം കൂടിയാണ് ഇരട്ട. അഞ്ജലി, ശ്രീന്ദ, ആര്യ സലിം, ശ്രീകാന്ത് മുരളി, സാബുമോൻ, അഭിരാം, ശരത് സഭ, ഷെബിൻ ബെന്സന്, ശ്രീജ, ജിത്തു അഷ്‌റഫ് എന്നിവരും വേഷമിട്ടിരിക്കുന്ന ഈ ചിത്രത്തിന് ഓരോ ദിനം പിന്നിടുംതോറും തീയേറ്ററുകളിൽ തിരക്കേറുകയാണ്. ഒരു നല്ല ചിത്രത്തിന്റെ മഹാവിജയത്തിനാണ് ഇരട്ടക്ക് ലഭിക്കുന്ന സ്വീകരണത്തിലൂടെ നമ്മൾ സാക്ഷ്യം വഹിക്കുന്നത്.