ബൈക്കിൽ സ്റ്റണ്ട് കാണിച്ചമ്പരപ്പിച്ചു ജോജു ജോർജ്..!

മലയാള സിനിമയുടെ പുതിയ തലമുറയിലെ മികച്ച നടന്മാരിൽ ഒരാളാണ് ജോജു ജോർജ്. മികച്ച നടനെന്ന പേരിനൊപ്പം താര പദവിയും നേടിയെടുത്ത ഈ പ്രതിഭ ഇപ്പോൾ കൈ നിറയെ പ്രൊജെക്ടുകളുമായി തിരക്കിലാണ്. ധനുഷ് – കാർത്തിക് സുബ്ബരാജ് ചിത്രം ജഗമേ തന്തിരത്തിലൂടെ തമിഴിലും അരങ്ങേറ്റം കുറിക്കാനൊരുങ്ങുന്ന ജോജു ജോർജ് മികച്ച ചിത്രങ്ങൾ നമ്മുടെ മുന്നിലെത്തിച്ചിട്ടുള്ള ഒരു നിർമ്മാതാവ് കൂടിയാണ്. ഇപ്പോഴിതാ പീസ് എന്ന തന്റെ പുതിയ ചിത്രത്തിന്റെ തിരക്കിലാണ് ഈ നടൻ. ഇതിന്റെ ലോക്കേഷനിൽ നിന്നുള്ള ജോജുവിന്റെ ഒരു സ്റ്റിലാണ് ഇപ്പോൾ സോഷ്യൽ മീഡിയയിൽ വൈറലായി മാറുന്നത്. ജോജു ബൈക്ക് സ്റ്റണ്ട് ചെയ്യുന്ന ഈ സ്റ്റിൽ കണ്ട ആരാധകരും സിനിമാ പ്രേമികളും അക്ഷരാർത്ഥത്തിൽ അമ്പരന്നിരിക്കുകയാണ് എന്ന് തന്നെ പറയാം. ബൈക്കിന്റെ മുൻ ചക്രം വായുവിൽ ഉയർത്തിക്കൊണ്ട് ബൈക്കിലിരിക്കുന്ന ജോജു ജോര്ജിനെയാണ് ചിത്രത്തിൽ കാണാൻ സാധിക്കുന്നത്.

ചുരുളി, നായാട്ടു, സ്റ്റാർ എന്നീ ചിത്രങ്ങൾക്ക് ശേഷം ജോജു അഭിനയിച്ച തുടങ്ങിയ ഈ ചിത്രം ഒരു ത്രില്ലർ ആയാണ് ഒരുക്കുന്നത് എന്ന് റിപ്പോർട്ടുകളുണ്ട്. നവാഗതനായ സൻഫീർ കെ സംവിധാനം ചെയ്യുന്ന ഈ ചിത്രം തൊടുപുഴയിൽ കഴിഞ്ഞ ദിവസമാണ് ആരംഭിച്ചത്. സ്ക്രിപ്റ്റ് ഡോക്ടർസ് പിക്ചർസ്‌ ആണ് ഈ ചിത്രം നിർമ്മിക്കുന്നത്. ജോജു ജോർജിനൊപ്പം അദിതി രവി, ലെന, സിദ്ദിഖ്, ശാലു റഹിം, ആശ ശരത്, വിജിലേഷ് എന്നിവരും ഈ ചിത്രത്തിന്റെ താരനിരയിൽ ഉണ്ട്. സഫീർ സനൽ, രമേശ് ഗിരിജ എന്നിവർ ചേർന്ന് രചിച്ചിരിക്കുന്നു ഈ ചിത്രത്തിന് ക്യാമറ ചലിപ്പിക്കുന്നത് ജിബ്രാൻ ഷമീറും എഡിറ്റിംഗ് നിർവഹിക്കുന്നത് നൗഫൽ അബ്ദുല്ലയുമാണ്. ജുബൈർ മുഹമ്മദാണ് ഈ ചിത്രത്തിന്റെ സംഗീത സംവിധായകൻ.