മമ്മൂട്ടിയുമായി ഒന്നിക്കുമ്പോൾ ഉണ്ടാകുന്ന വമ്പൻ പ്രേക്ഷക പ്രതീക്ഷകൾ; മനസ്സ് തുറന്ന് ജീത്തു ജോസഫ്.

മലയാള സിനിമയിലെ സൂപ്പർ ഹിറ്റ് സംവിധായകരിൽ ഒരാളാണ് ജീത്തു ജോസഫ്. മൈ ബോസ്, മെമ്മറീസ്, ദൃശ്യം, ദൃശ്യം 2 , ട്വൽത് മാൻ എന്നീ സൂപ്പർ ഹിറ്റുകൾ മലയാളത്തിൽ സമ്മാനിച്ച ജീത്തു ജോസഫ്, തമിഴിൽ പാപനാശം എന്ന സൂപ്പർ ഹിറ്റും ഒരുക്കിയിട്ടുണ്ട്. ഇത് കൂടാതെ ഹിന്ദിയിലും തെലുങ്കിലും ചിത്രങ്ങൾ സംവിധാനം ചെയ്തിട്ടുള്ള ആളാണ് അദ്ദേഹം. കംപ്ലീറ്റ് ആക്ടർ മോഹൻലാലിനെ വെച്ച് ഇൻഡസ്ട്രി ഹിറ്റായ ദൃശ്യം, പാൻ ഇന്ത്യൻ ഒടിടി സൂപ്പർ ഹിറ്റുകളായ ദൃശ്യം 2 , ട്വൽത് മാൻ എന്നിങ്ങനെ ഹാട്രിക്ക് വിജയങ്ങൾ സമ്മാനിച്ച ജീത്തു ജോസഫ് ഇതുവരെ മെഗാ സ്റ്റാർ മമ്മൂട്ടിയെ നായകനാക്കി ഒരു ചിത്രമൊരുക്കിയിട്ടില്ല. അത്കൊണ്ട് തന്നെ അദ്ദേഹത്തോടൊപ്പമൊരു ചിത്രം തന്റെ വലിയ ആഗ്രഹമാണെന്നു ജീത്തു ജോസഫ് പറയുന്നു. നേരത്തെ ഒന്ന് രണ്ടു കഥകൾ ആലോചിച്ചെങ്കിലും അത് അദ്ദേഹത്തിന് ഇഷ്ടപ്പെട്ടില്ല എന്നും, പുതിയ ചിലതു ആലോചിക്കുന്നുണ്ടെന്നും ജീത്തു ജോസഫ് പറയുന്നു.

ഫില്‍മി ബീറ്റ്സ് മലയാളം എന്ന ചാനലിന് നല്‍കിയ അഭിമുഖത്തില്‍ സംസാരിക്കുമ്പോഴാണ് അദ്ദേഹം ഇത് വെളിപ്പെടുത്തിയത്. താനും മമ്മൂക്കയും ഒന്നിക്കുന്ന ഒരു സിനിമ വരുന്നു എന്ന് പറയുമ്പോള്‍ തന്നെ വലിയ പ്രതീക്ഷകളായിരിക്കുമുണ്ടാവുകയെന്നും അതിനു പറ്റിയ ഒരു കഥയാണ് ആലോചിക്കുന്നതെന്നും അദ്ദേഹം വെളിപ്പെടുത്തി. അടുത്ത് റിലീസ് ചെയ്ത പുഴു പോലത്തെ ഒരു ചിത്രം, മമ്മുക്ക ചെയ്തത് വളരെ വലിയ കാര്യമാണെന്നും ഒരു അഭിനേതാവിന്റെ ആഗ്രഹമാണ് അതിൽ കാണാൻ സാധിക്കുന്നതെന്നും ജീത്തു ജോസഫ് പറയുന്നു. ഇന്നത്തെ യുവ താരങ്ങൾ പലരും അത് കണ്ടു പഠിക്കണമെന്നും ജീത്തു ജോസഫ് പറഞ്ഞു. വ്യത്യസ്ത കഥാപാത്രങ്ങൾ ചെയ്യാനുള്ള ആ ആഗ്രഹമാണ് ആ പരിശ്രമമാണ് അദ്ദേഹത്തിന്റെ മഹത്വമെന്നും ജീത്തു വിശദീകരിക്കുന്നു.