ഫഹദ് ഫാസിലിന് പ്രശംസയുമായി അന്താരാഷ്ട്ര മാധ്യമം..!

മഹേഷ് നാരായണൻ സംവിധാനം ചെയ്ത മാലിക് എന്ന ചിത്രം ജൂലൈയിൽ ആണ് ആമസോൺ പ്രൈം റിലീസ് ആയി എത്തിയത്. സമ്മിശ്ര പ്രതികരണം നേടിയ ഈ ചിത്രം ഒട്ടേറെ രാഷ്ട്രീയ ചർച്ചകൾക്ക് വരെ സോഷ്യൽ മീഡിയയിൽ ഇടമൊരുക്കി. ചിത്രത്തെ അനുകൂലിച്ചും പ്രതികൂലിച്ചും ഒട്ടേറെ പേര് രംഗത്ത് വന്നെങ്കിലും എല്ലാവരും ഒരേ സ്വരത്തിൽ മികച്ച അഭിപ്രായം പറഞ്ഞത് അഭിനേതാക്കളുടെ പ്രകടനത്തെ കുറിച്ചാണ്. അതിൽ തന്നെ നായകനായ ഫഹദ് ഫാസിലിന്റെ പ്രകടനത്തിന് വലിയ രീതിയിലുള്ള പ്രശംസയാണ് ലഭിച്ചത്. ഇപ്പോഴിതാ അന്താരാഷ്ട്ര മാധ്യമത്തിന്റെ വരെ നല്ല വാക്കുകളാണ് ഫഹദിന്റെ പ്രകടനത്തെ തേടി എത്തിയിരിക്കുന്നത്. ചിത്രത്തിലെ ഫഹദിന്റെ പ്രകടനത്തെ അഭിനന്ദിച്ച് കൊണ്ട് എത്തിയിരിക്കുന്നത് അന്താരാഷ്ട്ര മാധ്യമമായ അല്‍ജസീറ ആണ്. പുത്തന്‍ മാറ്റങ്ങള്‍ നടക്കുന്ന മലയാള സിനിമയുടെ നായകന്‍ എന്ന് കരുതപ്പെടുന്ന ഫഹദിന് വലിയൊരു മാറ്റം തന്നെ ഉണ്ടാക്കാൻ സാധിക്കും എന്ന് പറയുന്ന അൽ ജസീറ, ഫഹദ് ചെയ്തിട്ടുള്ള എല്ലാ കഥാപാത്രങ്ങളും കയ്യടി അര്‍ഹിക്കുന്നതാണെന്നും കൂട്ടിച്ചേർക്കുന്നു.

കയ്യെത്തും ദൂരത്ത് അഭിനയിച്ചതുമുതലുള്ള ഫഹദിന്റെ സിനിമാ ജീവിതത്തെയും വ്യക്തമായി പരാമർശിക്കുന്ന റിപ്പോർട്ടിൽ, അല്‍ജസീറയുമായി ഫഹദ് ഫാസിലും മഹേഷ് നാരായണനും നടത്തിയ അഭിമുഖത്തില്‍ ഇരുവരും പറഞ്ഞ കാര്യങ്ങളും പ്രത്യേകമായി ചേർത്തിട്ടുണ്ട്. കഥാപാത്രമല്ല, പകരം കഥയും ആ കഥ പറയുന്ന ആഖ്യാനശൈലിയും സാങ്കേതികയുമൊക്കെയാണ് തനിക്കു എപ്പോഴും പ്രധാനമായി തോന്നിയിട്ടുള്ളതെന്ന് എന്ന് ഫഹദ് അൽ ജസീറയോട് പറയുന്നു. നമുക്ക് ഉണ്ടാവുന്ന അനുഭവം പോലെ തന്നെ സിനിമയും യാഥാര്‍ത്ഥ്യമുള്ളതായിരിക്കണമെന്നും കഥയുമായി പ്രേക്ഷകര്‍ക്ക് ഒരു ബന്ധം തോന്നണം എന്നും അദ്ദേഹം പറഞ്ഞു. ഫഹദിനൊപ്പം തന്നെ വിനയ് ഫോർട്ട്, ദിലീഷ് പോത്തൻ, ജോജു ജോർജ് എന്നിവരും പ്രേക്ഷകരുടെ പ്രശംസ നേടിയെടുത്ത പ്രകടനമാണ് മാലികിൽ കാഴ്ച വെച്ചത്.