നിവിൻ പോളിയുടെ പടവെട്ട് ഏറ്റെടുത്തു ഇന്ത്യയിലെ വമ്പൻ നിർമ്മാണ കമ്പനി

മലയാളത്തിലെ യുവ താരം നിവിൻ പോളി നായകനായി എത്തുന്ന പുതിയ ചിത്രങ്ങളിൽ ഒന്നാണ് പടവെട്ട്. യുവ താരം സണ്ണി വെയ്ൻ ആദ്യമായി നിർമ്മിക്കുന്ന ഈ മലയാള ചിത്രം സംവിധാനം ചെയ്യുന്നത് ലിജു കൃഷ്ണ ആണ്.  തൊണ്ണൂറു ശതമാനവും ചിത്രീകരണം പൂർത്തിയായ ഈ ചിത്രത്തിന്റെ നിർമ്മാണ പങ്കാളിയായി ഇപ്പോഴിതാ ഇന്ത്യൻ സിനിമയിലെ വമ്പൻ നിർമ്മാണ കമ്പനികളിൽ ഒന്നായ സാ.രേ.ഗാ.മ.പാ എത്തുകയാണ്. ഇന്ത്യൻ സംഗീത വ്യവസായ ലോകത്തെ ഭീമന്മാരായ സാരേഗാമ സിനിമ, ഇപ്പോഴിതാ പടവെട്ടിലൂടെ അവർ മലയാള സിനിമാ നിർമ്മാണ രംഗത്തും ചുവടുറപ്പിക്കാൻ പോവുകയാണ്. നിവിൻ പോളിക്കൊപ്പം മഞ്ജു വാര്യർ, സണ്ണി വെയ്ൻ എന്നിവരും പ്രത്യക്ഷപ്പെടുന്ന ഈ ചിത്രത്തിലെ നായികാ വേഷം ചെയ്യുന്നത്  അരുവി എന്ന തമിഴ് ചിത്രത്തിലൂടെ ശ്രദ്ധ നേടിയ അദിതി ബാലൻ ആണ്. സംവിധായകനായ ലിജു കൃഷ്ണ തന്നെ രചിച്ച ഈ ചിത്രത്തിന് സംഗീതം ഒരുക്കിയിരിക്കുന്നത് ഗോവിന്ദ് വസന്ത ആണ്.

നിവിൻ പോളിയുടെ കരിയറിലെ തന്നെ വലിയ ചിത്രങ്ങളിൽ ഒന്നായി ഒരുങ്ങുന്ന ഈ ചിത്രം വമ്പൻ ബഡ്ജറ്റിലാണ് നിർമ്മിക്കുന്നത്. ഈ ചിത്രത്തിന് വേണ്ടി വലിയ രീതിയിൽ ശരീര ഭാരം കൂട്ടിയ നിവിൻ പോളി പുതിയ ലുക്കിൽ ആയിരിക്കും ഇതിന്റെ ബാക്കി ഭാഗത്തിൽ ജോയിൻ ചെയ്യുന്നത് എന്ന് റിപ്പോർട്ടുകൾ പറയുന്നു. ദീപക് ഡി മേനോന്‍ ഛായാഗ്രഹണവും, രംഗനാഥ് രവി സൗണ്ട് ഡിസൈനിങ്ങും കൈകാര്യം ചെയ്യുന്ന ഈ ചിത്രം എഡിറ്റ് ചെയ്യുന്നത് ഷെഫീഖ് മുഹമ്മദ് അലിയാണ്. മുകളിൽ പറഞ്ഞ താരങ്ങളെ കൂടാതെ ഷമ്മി തിലകന്‍, ഷൈന്‍ ടോം ചാക്കോ, ഇന്ദ്രന്‍സ്, സുധീഷ്, വിജയരാഘവന്‍ എന്നിവരും ഈ ചിത്രത്തിന്റെ താരനിരയിൽ ഉണ്ട്.