യുവതാരം ആന്റണി വർഗീസിന് വിവാഹാശംസകൾ നേർന്നു ഇന്ത്യൻ ക്രിക്കറ്റ് താരം..

പ്രശസ്ത സംവിധായകൻ ലിജോ ജോസ് പെല്ലിശ്ശേരി ഒരുക്കിയ അങ്കമാലി ഡയറീസ് എന്ന ചിത്രത്തിലൂടെ മലയാള സിനിമയിൽ അരങ്ങേറ്റം കുറിച്ച യുവ നടനമാരിൽ ഒരാളാണ് ആന്റണി വർഗീസ്. അതിലെ ഗംഭീര പ്രകടനത്തിലൂടെ കയ്യടി നേടിയ ഈ നടൻ, അതിനു ശേഷം ടിനു പാപ്പച്ചൻ ഒരുക്കിയ സ്വാതന്ത്ര്യം അർധരാത്രിയിൽ, ലിജോ ജോസ് പെല്ലിശ്ശേരിയുടെ തന്നെ ജെല്ലിക്കെട്ട് എന്നീ ചിത്രങ്ങളിലൂടെയും പ്രേക്ഷകരുടെ ശ്രദ്ധ നേടി. ഇനി ആന്റണി വർഗീസ് അഭിനയിച്ചു പുറത്തു വരാൻ ഉള്ളത് ടിനു പാപ്പച്ചൻ ഒരുക്കിയ അജഗജാന്തരവും, നിഖിൽ പ്രേംരാജ് ഒരുക്കിയ ആനപ്പറമ്പിലെ വേൾഡ് കപ്പ് എന്നൊരു ചിത്രവും ആണ്. ഇത് കൂടാതെ സൂപ്പർ ഹിറ്റ് സംവിധായകൻ ജിസ് ജോയ് ഒരുക്കുന്ന ചിത്രത്തിലും ആന്റണി വർഗീസ് അഭിനയിക്കുന്നുണ്ട്. മോഹൻലാലിനെ നായകനാക്കി ടിനു പാപ്പച്ചൻ ഒരു ചിത്രം ഒരുക്കുന്നുണ്ട് എന്നും അതിലും ആന്റണി വർഗീസ് അഭിനയിക്കുന്നുണ്ട് എന്നും സ്ഥിതീകരിക്കാത്ത റിപ്പോർട്ടുകൾ വന്നിരുന്നു. 

ഈ അടുത്ത ദിവസങ്ങളിലാണ് യുവ നടൻ ആന്റണി വിവാഹിതനായത് . അങ്കമാലി സ്വദേശിയായ അനീഷ പൗലോസ് ആണ് ആന്റണിയുടെ വധു. ഏറെ നാളത്തെ പ്രണയത്തിനൊടുവിലാണ് ഇരുവരും വിവാഹിതരായത്. വിദേശത്ത് നഴ്സ് ആണ് അനീഷ. ഇപ്പോഴിതാ ആന്റണി വർഗീസിന് വിവാഹ ആശംസകൾ നേർന്ന് മുന്നോട്ട് വന്നിരിക്കുകയാണ് മുൻ ഇന്ത്യൻ ക്രിക്കറ്റ് താരം യൂസഫ്‌ പത്താൻ. തന്റെ ഇൻസ്റ്റാഗ്രാം അക്കൗണ്ടിൽ കൂടിയാണ് ആന്റണി വർഗീസിന് ആശംസകൾ നേർന്ന് കൊണ്ട് യൂസഫ് പത്താൻ എത്തിയിരിക്കുന്നത്. നേരത്തെ ആന്റണിയുടെ വിവാഹത്തിന് മുന്നോടിയായുള്ള ഹൽദി ചടങ്ങുകളുടെയും വിവാഹ നിശ്ചയത്തിന്റെയും വീഡിയോ സോഷ്യൽ മീഡിയയിൽ വലിയ രീതിയിൽ വൈറൽ ആയിരുന്നു. അങ്കമാലി ഡയറിസിലെ കഥാപാത്രത്തിന്റെ പേരായ പെപ്പേ എന്ന പേരുപയോഗിച്ചാണ് ആരാധകർ ഈ നടനെ ആഘോഷിക്കുന്നത്