അഭിനയ ജീവിതത്തോട് വിട പറയാനൊരുങ്ങി കമൽ ഹാസൻ; ഇന്ത്യൻ 2 അവസാന ചിത്രമെന്ന സൂചന നൽകി ഉലക നായകൻ..!

ഉലക നായകൻ കമൽ ഹാസൻ തന്റെ പുതിയ ചിത്രം ആരംഭിക്കാൻ പോവുകയാണ്. അദ്ദേഹത്തിന്റെ കരിയറിലെ ഏറ്റവും വലിയ വിജയങ്ങളിൽ ഒന്നായ ഷങ്കർ ചിത്രമായ ഇന്ത്യൻ എന്ന ചിത്രത്തിന്റെ രണ്ടാം ഭാഗവുമായാണ് കമൽ ഹാസൻ ഇനി എത്താൻ പോകുന്നത്. ഇന്ത്യൻ 2 എന്ന് പേരിട്ടിരിക്കുന്ന ഈ ചിത്രം ശങ്കർ തന്നെയാണ് സംവിധാനം ചെയ്യാൻ പോകുന്നത്. വമ്പൻ ബഡ്ജറ്റിൽ ഒരുക്കാൻ പോകുന്ന ഈ ചിത്രം ഈ വരുന്ന ഡിസംബർ പതിനാലു മുതൽ ആരംഭിക്കും എന്നാണ് റിപ്പോർട്ടുകൾ പറയുന്നത്. കാജൽ അഗർവാൾ ആയിരിക്കും ഈ ചിത്രത്തിൽ നായിക എന്നും മലയാളത്തിൽ നിന്ന് മെഗാ സ്റ്റാർ മമ്മൂട്ടിയും ഈ ചിത്രത്തിൽ അഭിനയിച്ചേക്കാം എന്നും വാർത്തകൾ വരുന്നുണ്ട്. എന്നാൽ ഇപ്പോൾ വരുന്ന റിപ്പോർട്ടുകൾ പറയുന്നത് ഇന്ത്യൻ 2 കമല ഹാസന്റെ അഭിനയ ജീവിതത്തിലെ അവസാന ചിത്രമായേക്കാം എന്നാണ്.

ഈ ചിത്രത്തോടെ അഭിനയ രംഗത്ത് നിന്ന് വിട പറഞ്ഞേക്കാം എന്ന സൂചന കമൽ ഹാസൻ നൽകി കഴിഞ്ഞു. മക്കൾ നീതി മയ്യം എന്ന ഒരു രാഷ്ട്രീയ പാർട്ടിക്ക് കമല ഹാസൻ കുറച്ചു നാൾ മുൻപ് രൂപം നൽകിയിരുന്നു. അതുകൊണ്ടു മുഴുവൻ സമയ രാഷ്ട്രീയ പ്രവർത്തനത്തിനാണ് സിനിമയിൽ നിന്ന് വിരമിക്കുന്നതെന്നു കമല ഹാസൻ പത്ര സമ്മേളത്തിൽ സൂചിപ്പിച്ചു . പക്ഷെ തന്റെ നിർമ്മാണ കമ്പനി മുന്നോട്ടു പോകുമെന്നും കമല ഹാസൻ വാർത്താ സമ്മേളനത്തിൽ പറഞ്ഞു . കഴിഞ്ഞ രണ്ടു ദിവസമായി വിവിധ പരിപാടികളുടെ ഭാഗമായി കമൽ കേരളത്തിൽ ഉണ്ട് . ഇപ്പോൾ വിക്രം നായകനായ പുതിയ തമിഴ് ചിത്രം നിർമ്മിക്കുന്നത് കമൽ ഹാസൻ ആണ്.