സൂപ്പർ താരങ്ങളില്ലാത്ത ചിത്രത്തിന് റിലീസിന് മുൻപേ മികച്ച സാറ്റലൈറ്റ് റൈറ്റ്സ്; ഇളയ രാജ എത്തുന്നു..

വളരെ അപൂർവമായി മാത്രമേ സൂപ്പർ താരങ്ങളോ യുവ താരങ്ങളോ ഇല്ലാത്ത ചിത്രങ്ങൾക്ക് റിലീസിന് മുൻപേ തന്നെ സാറ്റലൈറ്റ് റൈറ്റ്സ് ലഭിക്കാറുള്ളു. മികച്ചതാവും എന്ന് അത്ര ഉറപ്പുള്ള ചിത്രങ്ങൾക്ക് ആണ് അങ്ങനെ ലഭിക്കാറ്‌. ഇപ്പോഴിതാ ആ അപൂർവത തേടിയെത്തിയിരിക്കുകയാണ് ഗിന്നസ് പക്രു നായകനായി എത്തുന്ന ഇളയ രാജ എന്ന ചിത്രത്തെ. ഇനിയും റിലീസ് ആയിട്ടില്ലാത്ത ഈ ചിത്രത്തിന്റെ സാറ്റലൈറ്റ് അവകാശം വാങ്ങിയിരിക്കുന്നത് പ്രമുഖ ചാനൽ ആയ മഴവിൽ മനോരമ ആണ്. മികച്ച ഒരു തുക തന്നെ നൽകിയാണ് ഈ ചെറിയ  ചിത്രത്തിന്റെ സംപ്രേക്ഷണാവകാശം മഴവിൽ മനോരമ ചാനൽ സ്വന്തമാക്കിയിരിക്കുന്നത് എന്നറിയുന്നു. മേൽവിലാസം , അപ്പോത്തിക്കിരി എന്നീ നിരൂപ പ്രശംസ നേടിയ ചിത്രങ്ങൾ ഒരുക്കിയ മാധവ് രാമദാസൻ സംവിധാനം ചെയ്ത ചിത്രമാണ് ഇളയ രാജ.

പ്രശസ്ത ബാനർ ആയ ഇ ഫോർ എന്റർടൈൻമെന്റ് ആണ് ഈ ചിത്രം കേരളത്തിൽ വിതരണം ചെയ്യുന്നത്. ഈ ചിത്രം കണ്ട ഇ ഫോർ എന്റർടൈൻമെന്റ് ഉടമസ്ഥരിൽ ഒരാളായ സി വി സാരഥി ഗിന്നസ് പക്രുവിന്റെ പ്രകടനത്തെ വാനോളം പുകഴ്ത്തുകയും ചെയ്തു. അസാധ്യ പ്രകടനമാണ് ഗിന്നസ് പക്രു ഈ ചിത്രത്തിൽ കാഴ്ച വെച്ചിരിക്കുന്നത് എന്നാണ് അദ്ദേഹം പറഞ്ഞത്. സജിത്ത് കൃഷ്ണ, ജയരാജ് ടി കൃഷ്ണൻ, ബിനീഷ് ബാബു എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിന് തിരക്കഥ രചിച്ചിരിക്കുന്നത് സുദീപ് ടി ജോർജ് ആണ്.  ഗിന്നസ് പക്രുവിനൊപ്പം ഗോകുൽ സുരേഷ് , ദീപക് എന്നിവരും ഈ ചിത്രത്തിന്റെ താര നിരയുടെ ഭാഗം ആണ്. രതീഷ് വേഗ സംഗീതം ഒരുക്കിയ ഈ ചിത്രത്തിന് വേണ്ടി ദൃശ്യങ്ങൾ നൽകിയത് പാപ്പിനു ആണ്.