താനല്ലെങ്കിൽ ജോസഫിൽ നായകനായി കാണാൻ ആഗ്രഹം മമ്മുക്കയെ എന്ന് ജോജു ജോർജ്..!

ജോജു ജോർജ് നായകനായി എത്തിയ ജോസഫ് എന്ന ചിത്രം മികച്ച വിജയം നേടി മുന്നോട്ട് പോവുകയാണ് ഇപ്പോൾ. എം പദ്മകുമാർ സംവിധാനം ചെയ്ത ഈ ചിത്രം രചിച്ചത് ഷാഹി കബീർ ആണ്. തന്റെ കരിയർ ബെസ്റ്റ്  പ്രകടനം ആണ് ഈ ചിത്രത്തിന് വേണ്ടി ജോജു ജോർജ് കാഴ്ച വെച്ചിരിക്കുന്നത്. പ്രേക്ഷകരും നിരൂപകരും ഒരുപോലെ അഭിനന്ദിക്കുകയാണ് ജോജുവിനെ ഇപ്പോൾ. ജോസഫ് എന്ന കഥാപാത്രം അത്ര ഗംഭീരമായാണ് ജോജു നമ്മുക്ക് മുന്നിൽ എത്തിച്ചിരിക്കുന്നത്. മാത്രമല്ല ഈ ചിത്രത്തിന്റെ നിർമ്മാതാവും ജോജു തന്നെയാണ്. എന്നാൽ താൻ ഈ ചിത്രത്തിന്റെ നിർമ്മാതാവ് മാത്രം ആയിരുന്നെങ്കിൽ, താരമൂല്യമുള്ള മറ്റൊരു നായകനെ ഈ കഥാപാത്രം അവതരിപ്പിക്കാൻ തിരഞ്ഞെടുക്കുമായിരുന്നു  എങ്കിൽ അത് മമ്മൂട്ടിയെ ആയിരിക്കും എന്നാണ് ജോജു പറയുന്നത്. 

അടുത്തിടെ നടന്ന ഒരു റേഡിയോ ഇന്റർവ്യൂവിൽ ആണ് ജോജു ഇങ്ങനെ പറയുന്നത്. ഈ കഥാപാത്രം ഒരുപക്ഷെ തന്നെക്കാൾ ഗംഭീരമായി മമ്മുക്ക ചെയ്തേനെ എന്നും ജോജു പറയുന്നു. അപ്പു പാത്തു പപ്പു പ്രൊഡക്ഷൻ ഹൗസിന്റെ ബാനറിൽ ആണ് ജോജു ഈ ചിത്രം നിർമ്മിച്ചിരിക്കുന്നത്. വൈകാതെ തന്നെ ജോസഫ് ഗൾഫിലും റിലീസ് ചെയ്യാൻ പോവുകയാണ്. രഞ്ജിൻ രാജ് സംഗീതം ഒരുക്കിയ ഈ ചിത്രം എഡിറ്റ് ചെയ്തത് കിരൺ ദാസും ദൃശ്യങ്ങൾ ഒരുക്കിയത് മനേഷ് മാധവനും ആണ്. ജോസഫ് എന്ന വിരമിച്ച പോലീസ് ഉദ്യോഗസ്ഥൻ നടത്തുന്ന ഒരു അന്വേഷണം ആണ് ഈ  ത്രില്ലെർ ചിത്രം നമ്മുടെ മുന്നിൽ അവതരിപ്പിക്കുന്നത്.  ദിലീഷ് പോത്തൻ, സുധി കോപ്പ, ഇർഷാദ്, മാളവിക, ആത്മീയ  തുടങ്ങിയവരും ഈ ചിത്രത്തിൽ നിർണായക കഥാപാത്രങ്ങളെ അവതരിപ്പിക്കുന്നുണ്ട്.