ഇത് പൂർണമായും എന്റെ ചിത്രം; കമൽ സർ തന്നത് പൂർണ്ണ സ്വാതന്ത്ര്യം; വെളിപ്പെടുത്തി ലോകേഷ് കനകരാജ്..!

മാനഗരം, കൈദി, മാസ്റ്റർ എന്നീ സൂപ്പർ ഹിറ്റ് ചിത്രങ്ങൾക്ക് ശേഷം ലോകേഷ് കനകരാജ് ഒരുക്കിയ ഏറ്റവും പുതിയ ചിത്രമാണ് വിക്രം. ഉലക നായകൻ കമൽ ഹാസൻ നായകനായി എത്തുന്ന ഈ ചിത്രം ജൂണ് മൂന്നിന് ആണ് റിലീസ് ചെയ്യുക. ഇപ്പോഴിതാ ഈ ചിത്രത്തെ കുറിച്ച് കൂടുതൽ വെളിപ്പെടുത്തി മുന്നോട്ട് വന്നിരിക്കുകയാണ് ഇതിന്റെ സംവിധായകൻ ലോകേഷ്. ഇത് പൂർണമായും തന്റെ ചിത്രം ആണെന്നും അങ്ങനെ ആവണം എന്ന് തനിക്ക് ആഗ്രഹം ഉണ്ടെന്ന് ആദ്യം തന്നെ കമൽ സാറിനോട് താൻ പറഞ്ഞിരുന്നു എന്നും ലോകേഷ് പറയുന്നു. അത്കൊണ്ട് തന്നെ തനിക്ക് പൂർണ്ണ സ്വാതന്ത്ര്യം ആണ് അദ്ദേഹം തന്നത് എന്നും ഒരു നിർദേശമോ ഇടപെടലോ അദ്ദേഹത്തിന്റെ ഭാഗത്ത്‌ നിന്നും ഉണ്ടായില്ല എന്നും ലോകേഷ് വെളിപ്പെടുത്തി.

കമൽ ഹാസന്റെ മെഗാ ആക്ഷൻ സീനുകൾ ആണ് ഈ ചിത്രത്തിന്റെ ഹൈലൈറ്റ് എന്ന് അണിയറ പ്രവർത്തകർ അവകാശപ്പെടുന്നത്. കമൽ ഹാസനൊപ്പം മലയാളത്തിന്റെ നടനായ ഫഹദ് ഫാസിൽ, ഒപ്പം മക്കൾ സെൽവൻ വിജയ് സേതുപതി, ചെമ്പൻ വിനോദ്, കാളിദാസ് ജയറാം, നരെയ്ൻ തുടങ്ങി ഒരു വലിയ താരനിര തന്നെ ഈ ചിത്രത്തിന്റെ ഭാഗമാണ്. തന്റെ നിർമ്മാണ ബാനർ ആയ രാജ് കമൽ ഇന്റർനാഷനലിന്റെ കീഴിൽ നിർമിക്കുന്ന ഈ ചിത്രത്തിന് സംഗീതം ഒരുക്കിയത് അനിരുദ്ധ് രവിചന്ദർ, കാമറ ചലിപ്പിച്ചത് മലയാളിയായ ഗിരീഷ് ഗംഗാധരൻ, എഡിറ്റ് ചെയ്യുന്നത് ഫിലോമിൻ രാജ് എന്നിവരാണ്. ഇതിന്റെ ഒരു ടീസർ, മേക്കിങ് വീഡിയോ, പോസ്റ്ററുകൾ എന്നിവ സോഷ്യൽ മീഡിയയിൽ സൂപ്പർ ഹിറ്റാണ്.