മോഹൻലാൽ ചിത്രത്തിന് ശേഷം ഹണി റോസ് ബാലയ്യക്കൊപ്പം

ഇന്ന് മലയാളത്തിലെ പ്രശസ്ത നടിമാരിലൊരാളായ ഹണി റോസ് ഇനി തെലുങ്കിലും ശ്രദ്ധ നേടാനുള്ള ഒരുക്കത്തിലാണ്. അടുത്തിടെ റിലീസ് ചെയ്ത മോഹൻലാൽ- വൈശാഖ് ചിത്രമായ മോൺസ്റ്ററിൽ, ഭാമിനി എന്ന കഥാപാത്രമായി തന്റെ കരിയർ ബെസ്റ്റ് പ്രകടനമാണ് ഈ നടി കാഴ്ച വെച്ചത്. അതിന് ശേഷം മറ്റൊരു വലിയ ചിത്രത്തിന്റെ ഭാഗമായി എത്തുകയാണ് ഈ നടി. തെലുങ്കിലെ സൂപ്പർ താരം ബാലയ്യ നായകനായി എത്തുന്ന പുതിയ ചിത്രത്തിൽ ഒരു നിർണ്ണായക വേഷം ചെയ്ത് കൊണ്ടാണ് ഹണി റോസ് എത്തുന്നത്. ഈ ചിത്രത്തിലെ വ്യത്യസ്തമായ ലുക്കും ഇപ്പോൾ പുറത്ത് വന്നിട്ടുണ്ട്. ഹണി റോസിന്റെ കരിയറിലെ തന്നെ വഴിത്തിരിവായി മാറിയേക്കാവുന്ന വേഷമാണ് ഈ ബാലയ്യ ചിത്രത്തിൽ അവർ അവതരിപ്പിക്കുന്നതെന്നും വാർത്തകൾ വരുന്നുണ്ട്. തെലുങ്കു സൂപ്പർ താരം നന്ദമുറി ബാലകൃഷ്ണ എന്ന ബാലയ്യയുടെ നൂറ്റിയേഴാം ചിത്രത്തിലാണ് ഹണി റോസ് വേഷമിടുന്നത്.

വീര സിംഹ റെഡ്ഢി എന്നാണ് ഈ ചിത്രത്തിന് നൽകിയിരിക്കുന്ന പേര്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ, ടീസർ എന്നിവ ഇതിനോടകം പുറത്തു വരികയും വലിയ ശ്രദ്ധ നേടുകയും ചെയ്തിട്ടുണ്ട്. കറുത്ത ഷർട്ടും നരച്ച താടിയും പിരിച്ചു വെച്ച മീശയും കൂളിംഗ് ഗ്ലാസും ധരിച്ച്, മുണ്ടുടുത്താണ് മാസ്സ് ലുക്കിൽ ബാലയ്യ ഈ ചിത്രത്തിൽ എത്തുന്നത്. തെന്നിന്ത്യൻ സൂപ്പർ നായികാതാരമായ ശ്രുതി ഹാസനാണ് ഇതിലെ മറ്റൊരു നിർണ്ണായക സ്ത്രീ കഥാപാത്രത്തിന് ജീവൻ നൽകുന്നത്. മീനാക്ഷി എന്നാണ് ഇതിൽ ഹണി റോസ് ചെയ്യന്ന കഥാപാത്രത്തിന്റെ പേര്. ഈ ചിത്രത്തിന്റെ കഥയും തിരക്കഥയുമെഴുതി സംവിധാനം ചെയ്തിരിക്കുന്നത് ഗോപിചന്ദ് മല്ലിനേനിയാണ്. മൈത്രി മൂവി മേക്കേഴ്‌സ് നിർമ്മിക്കുന്ന ഈ ചിത്രത്തിൽ വരലക്ഷ്മി ശരത്കുമാറും നിർണ്ണായക വേഷം ചെയ്യുന്നു. തമൻ എസ് സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിക്കുന്നത് ഋഷി പഞ്ചാബി, എഡിറ്റ് ചെയ്യുന്നത് നവീൻ നൂലി എന്നീ സാങ്കേതിക പ്രവർത്തകരാണ്.