കാതൽ പൂർത്തിയാക്കി മമ്മൂട്ടി; അടുത്ത ചിത്രം ഏതെന്നറിയാനുള്ള ആകാംക്ഷയിൽ ആരാധകർ

മെഗാസ്റ്റാർ മമ്മൂട്ടി കഴിഞ്ഞ ദിവസം തന്റെ പുതിയ ചിത്രത്തിലെ ഭാഗങ്ങൾ പൂർത്തിയാക്കി. കാതൽ എന്ന് പേരിട്ടിരിക്കുന്ന ഈ ചിത്രത്തിലെ തന്റെ ഭാഗങ്ങൾ പൂർത്തിയാക്കി എന്ന് മമ്മൂട്ടി തന്നെയാണ് സോഷ്യൽ മീഡിയ പോസ്റ്റിലൂടെ അറിയിച്ചത്. കാതൽ ടീമിനൊപ്പമുള്ള ജോലി ഏറെ ആസ്വദിച്ചു എന്നും മമ്മൂട്ടി സോഷ്യൽ മീഡിയ പോസ്റ്റിൽ കുറിച്ചു. രണ്ട് പെൺകുട്ടികൾ, കുഞ്ഞു ദൈവം, കിലോമീറ്റർസ് ആൻഡ് കിലോമീറ്റർസ്, ദി ഗ്രേറ്റ് ഇന്ത്യൻ കിച്ചൻ, ഫ്രീഡം ഫൈറ്റ് എന്നീ ചിത്രങ്ങൾക്ക് ശേഷം ജിയോ ബേബി സംവിധാനം ചെയ്യുന്ന ചിത്രമാണ് കാതൽ. തീക്കോയി ഗ്രാമ പഞ്ചായത്തിലെ മൂന്നാം വാർഡിൽ നിന്ന് ഇടതു സ്വതന്ത്ര സ്ഥാനാർത്ഥിയായി മത്സരിക്കുന്ന മാത്യു ദേവസ്സി എന്ന കഥാപാത്രമായാണ് മമ്മൂട്ടി ഈ ചിത്രത്തിൽ അഭിനയിക്കുന്നത് എന്ന വിവരങ്ങൾ നേരത്തെ തന്നെ പുറത്ത് വന്നിരുന്നു.

മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെ നിർമ്മിക്കുന്ന ഈ ചിത്രത്തിലെ നായികാ വേഷം ചെയ്യുന്നത് പ്രശസ്ത തെന്നിന്ത്യൻ നായികയായ ജ്യോതികയാണ്. ലിജോ ജോസ് പെല്ലിശേരി ഒരുക്കിയ നൻ പകൽ നേരത്ത് മയക്കം, നിസാം ബഷീർ ഒരുക്കിയ റോഷാക്ക് എന്നിവക്ക് ശേഷം മമ്മൂട്ടി നിർമ്മിക്കുന്ന ചിത്രം കൂടിയാണിത്. ആദർഷ് സുകുമാരനും പോൾസൺ സ്‌കറിയയും ചേർന്ന് രചിച്ച ഈ ചിത്രത്തിൽ ലാലു അലക്സ്, മുത്തുമണി, ചിന്നു ചാന്ദിനി, സുധി കോഴിക്കോട്, അനഘ അക്കു, ജോസി സിജോ, ആദർശ് സുകുമാരൻ എന്നിവരും വേഷമിടുന്നു. സാലു കെ തോമസ് ക്യാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് ഫ്രാൻസിസ് ലൂയിസ്, ഇതിന് സംഗീതമൊരുക്കുന്നത് മാത്യൂസ് പുളിക്കൻ എന്നിവരാണ്. കാതൽ പൂർത്തിയാക്കിയ മമ്മൂട്ടി ഇനി ഏത് ചിത്രമാണ് ചെയ്യാൻ പോകുന്നതെന്നറിയാനുള്ള ആകാംക്ഷയിലാണ് ആരാധകർ. റോബി വർഗീസ് രാജ് ഒരുക്കാൻ പോകുന്ന ത്രില്ലർ, സിദ്ദിഖ് ഒരുക്കാൻ പോകുന്ന പുതിയ ചിത്രം എന്നിവ മമ്മൂട്ടിയുടെ പരിഗണനയിലുണ്ട്.