ഹിറ്റ് ജോഡികൾ വീണ്ടും; ദിലീപ്-മമത മോഹൻദാസ് ഒന്നിക്കുന്ന കോടതി സമക്ഷം ബാലൻ വക്കീൽ എത്തുന്നു..!

ഈ വർഷം മലയാള സിനിമാ പ്രേമികൾ ഏറെ കാത്തിരിക്കുന്ന സിനിമകളിൽ ഒന്നാണ് പ്രശസ്ത സംവിധായകൻ ബി ഉണ്ണികൃഷ്ണൻ രചിച്ചു സംവിധാനം ചെയ്ത കോടതി സമക്ഷം ബാലൻ വക്കീൽ . ജനപ്രിയ നായകൻ ദിലീപ് നായകനായി എത്തുന്ന ഈ ചിത്രത്തിലൂടെ ഹിറ്റ്‌ താരജോഡികൾ ആയ ദിലീപും മമത മോഹൻദാസും ഒരിക്കൽ കൂടി ഒന്നിക്കുന്നു എന്ന പ്രത്യേകതയും ഉണ്ട്. ഇതിനു മുൻപ് ഇവർ രണ്ടു പേരും ഒന്നിച്ച ചിത്രങ്ങൾ എല്ലാം തന്നെ വലിയ സാമ്പത്തിക വിജയങ്ങൾ ആയി മാറിയിരുന്നു എന്നത് തന്നെയാണ് ഈ കൂട്ടുകെട്ടിന്റെ പുതിയ ചിത്രത്തെയും ഏറെ പ്രതീക്ഷയോടെ നോക്കി കാണാൻ പ്രേക്ഷകരെ പ്രേരിപ്പിക്കുന്നത്. ഇവർ ഒരുമിച്ച മൈ ബോസ് ,ടു കൺട്രിസ് ,പാസ്സഞ്ചർ തുടങ്ങിയ സിനിമകൾ സൂപ്പർ ഹിറ്റുകൾ ആയി മാറി എന്നതിലുപരി മികച്ച സിനിമകളും ആയിരുന്നു എന്നതും ശ്രദ്ധേയമായ കാര്യമാണ് . ഒരിക്കൽ കൂടി ഈ കൂട്ടുകെട്ട് എത്തുമ്പോൾ മികച്ച ഒരു ചിത്രം തന്നെയാണ് കാണികൾ പ്രതീക്ഷിക്കുന്നത് .

 അനുരാധ സുദർശൻ എന്ന കഥാപാത്രമായി മമത മോഹൻദാസ് ഈ ചിത്രത്തിൽ എത്തുമ്പോൾ ബാലകൃഷ്ണൻ എന്ന വിക്കനായ ഒരു വക്കീൽ ആയാണ് ദിലീപ് എത്തുന്നത്. വ്യത്യസ്തമായ ചിത്രങ്ങൾ നമ്മുക്ക് സമ്മാനിച്ചിട്ടുള്ള ബി ഉണ്ണികൃഷ്ണൻ എന്ന സംവിധായകനിലും പ്രേക്ഷക പ്രതീക്ഷകൾ ഏറെയാണ്. ബോളിവുഡ് നിർമ്മാണ കമ്പനിയായ വയക്കോം ആദ്യമായി മലയാളത്തിൽ നിർമ്മിക്കുന്ന ഈ ചിത്രത്തിന്റെ ട്രെയിലർ ഇപ്പോൾ തന്നെ സോഷ്യൽ മീഡിയയിൽ തരംഗമായി കഴിഞ്ഞിട്ടുണ്ട്. വരുന്ന ഫെബ്രുവരി 21 നു റിലീസ് ചെയ്യാൻ പോകുന്ന ഈ ചിത്രത്തിൽ പ്രിയാ ആനന്ദും അഭിനയിക്കുന്നുണ്ട്.