ഷാജി എൻ കരുണിന്റെ ഓള് ഇന്ന് മുതൽ; പ്രതീക്ഷയോടെ പ്രേക്ഷകർ..!

പ്രശസ്ത സംവിധായകൻ ഷാജി എൻ കരുണ് സംവിധാനം ചെയ്ത ഓള് എന്ന ചിത്രം ഇന്ന് മുതൽ കേരളത്തിലെ പ്രധാന കേന്ദ്രങ്ങളിൽ പ്രദർശനം ആരംഭിക്കും. ടി ടി രാമകൃഷ്ണൻ തിരക്കഥ രചിച്ച ഈ ചിത്രത്തിൽ ഷെയ്ൻ നിഗം, എസ്തർ അനിൽ എന്നിവർ ആണ് പ്രധാന കഥാപാത്രങ്ങൾക്ക് ജീവൻ നൽകുന്നത്. ഒരു പ്രണയ കഥ ആയി ഒരുക്കിയിരിക്കുന്നതിന് ഒപ്പം തന്നെ ഫാന്റസി ഏലമെന്റുകളും കോർത്തിണക്കിയാണ് ഈ ചിത്രം കഥ പറയുന്നത് എന്നാണ് സൂചന. പ്രായപൂർത്തിയാവുന്നതിനു മുന്നേ ബലാത്സംഗത്തിന് ഇരയാവേണ്ടി വരുന്ന പെൺകുട്ടി ആയാണ് എസ്തർ അനിൽ ഈ ചിത്രത്തിൽ അഭിനയിക്കുന്നത്.

ആ കഥാപാത്രവും ഷെയ്ൻ നിഗം അവതരിപ്പിക്കുന്ന കഥാപാത്രവും എങ്ങനെ കണ്ടു മുട്ടുന്നു എന്നും തുടർന്നു അവന്റെ ജീവിതത്തിൽ ഉണ്ടാകുന്ന മാറ്റങ്ങൾ എന്തെല്ലാം എന്നൊക്കെയാണ് ഈ ചിത്രം നമ്മുക്ക് മുന്നിൽ അവതരിപ്പിക്കുന്നത് എന്നാണ് റിപ്പോർട്ടുകൾ പറയുന്നത്. അന്താരാഷ്ട്ര ചലച്ചിത്ര മേളകളിൽ പ്രദർശിപ്പിച്ചു മികച്ച അഭിപ്രായം നേടിയെടുത്ത ഈ ചിത്രം ദേശീയ പുരസ്കാരവും നേടിയെടുത്തിരുന്നു. മികച്ച ക്യാമറാമാനു ഉള്ള ദേശീയ പുരസ്‌കാരം നേടിയത് ഈ ചിത്രത്തിന് വേണ്ടി ക്യാമറ ചലിപ്പിച്ച അന്തരിച്ചു പോയ എം ജെ രാധാകൃഷ്ണൻ ആണ്. എ വി എ പ്രൊഡക്ഷൻസിന്റെ ബാനറിൽ എ വി അനൂപ് നിർമ്മിച്ച ഈ ചിത്രത്തിന് സംഗീതം ഒരുക്കിയിരിക്കുന്നത് ഐസക്ക് തോമസ് ആണ്. അതുപോലെ ദേശീയ പുരസ്‌കാര ജേതാവായ ശ്രീകർ പ്രസാദ് ആണ് ഓള് എഡിറ്റ് ചെയ്തിരിക്കുന്നത്. ഏതായാലും പ്രേക്ഷകർക്ക് ഏറെ പ്രതീക്ഷകൾ സമ്മാനിച്ചു കൊണ്ടാണ് ഓള് ഇന്ന് പ്രദർശനം ആരംഭിക്കുന്നത്.