സോഷ്യൽ മീഡിയ കീഴടക്കി ഇന്ത്യൻ 2 സെക്കന്റ് ലുക്ക്; ഗംഭീര രണ്ടാം വരവിനു സേനാപതി..!

നാളെ മുതൽ ആണ് ഇന്ത്യൻ 2 എന്ന ശങ്കർ ചിത്രത്തിന്റെ ചിത്രീകരണം തുടങ്ങുന്നത്. കമല ഹാസനെ നായകനാക്കി ഒരുപാട് വർഷങ്ങൾക്കു മുൻപ് ശങ്കർ ഒരുക്കിയ സൂപ്പർ ഹിറ്റ് ചിത്രമാണ് ഇന്ത്യൻ. കമല ഹാസന് ദേശീയ പുരസ്‍കാരം വരെ നേടിക്കൊടുത്ത ചിത്രമാണ് ഇന്ത്യൻ. ആ ചിത്രത്തിന്റെ രണ്ടാം ഭാഗം ആയാണ് ശങ്കർ ഇന്ത്യൻ 2 ഒരുക്കാൻ പോകുന്നത്. ആദ്യ ഭാഗത്തിലെ കേന്ദ്ര കഥാപാത്രമായ സേനാപതി ആയി തന്നെയാണ് കമല ഹാസൻ ഈ രണ്ടാം ഭാഗത്തിലും എത്തുന്നത്. പൊങ്കൽ ദിവസം റിലീസ് ചെയ്ത ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ ഗംഭീര പ്രേക്ഷക പ്രതികരണം ആണ് നേടിയെടുത്തത്. ഇപ്പോഴിതാ സോഷ്യൽ മീഡിയയെ ഇളക്കി മറിച്ചു കൊണ്ട് ഇന്ത്യൻ 2 ന്റെ സെക്കന്റ് ലുക്ക് പോസ്റ്റർ കൂടി റിലീസ് ചെയ്തിരിക്കുകയാണ്.

പ്രായം കൂടുതോറും കൂടുതൽ ബുദ്ധിമാനും അപകടകാരിയുമായ സേനാപതിയാണ് ഇനി എത്താൻ പോകുന്നത് എന്ന സൂചനയും സെക്കന്റ് ലുക്ക് പോസ്റ്റർ നമ്മുക്ക് നൽകുന്നു. ലൈക്ക പ്രൊഡക്ഷൻസ്  നിർമ്മിക്കുന്ന ഈ ബിഗ് ബജറ്റ് ചിത്രത്തിന് സംഗീതം ഒരുക്കുന്നത് അനിരുദ്ധ് ആണ്. എ ആർ റഹ്മാൻ ആയിരുന്നു ഇന്ത്യന് വേണ്ടി സംഗീതം ഒരുക്കിയിയത്. ഇന്ത്യൻ 2 നു വേണ്ടി കാമറ ചലിപ്പിക്കുന്നത് രവി വർമനും എഡിറ്റിംഗ് നിർവഹിക്കാൻ പോകുന്നത് ശ്രീകർ പ്രസാദും ആണ്. ജയമോഹൻ, കബിലൻ  വൈരമുത്തു, ലക്ഷ്മി ശരവണ കുമാർ എന്നിവർ ചേർന്നാണ് ഈ ചിത്രത്തിന് സംഭാഷണം  ഒരുക്കിയിരിക്കുന്നത്. പീറ്റർ ഹെയ്‌ൻ , ജാക്ക് ഗിൽ, ഗ്രിഫിത് എന്നിവർ ചേർന്ന് സംഘട്ടനം ഒരുക്കുന്ന ഈ ചിത്രം അടുത്ത വർഷം റിലീസ് ചെയ്യാൻ ആണ് പ്ലാൻ. എന്തിരൻ 2 നേടിയ വമ്പൻ വിജയത്തിന് ശേഷം ശങ്കർ ഒരുക്കുന്ന ചിത്രമാണ് ഇത്.