ബ്രഹ്മാണ്ഡ ചിത്രം മരക്കാർ തീയേറ്ററുകളിൽ എത്തുന്നു; പുതിയ റിലീസ് തീയതി പ്രഖ്യാപിച്ചു നിർമ്മാതാവ്…!

മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ചിത്രമായ മരക്കാർ അറബിക്കടലിന്റെ സിംഹം റിലീസിന് ഒരുങ്ങുകയാണ്. കഴിഞ്ഞ വർഷം മാർച്ചിലാണ്‌ ഈ ചിത്രം റിലീസ് ചെയ്യാൻ ഒരുങ്ങിയത് എങ്കിലും കോവിഡ് പ്രതിസന്ധി മൂലം തീയേറ്ററുകൾ എല്ലാം അടഞ്ഞപ്പോൾ റിലീസ് നീട്ടുകയായിരുന്നു. ഇപ്പോഴിതാ കോവിഡ് വാക്‌സിൻ വരികയും തീയേറ്ററുകൾ പതുക്കെ തുറന്നു പ്രവർത്തിക്കുകയും ചെയ്യുന്ന സാഹചര്യത്തിൽ മരക്കാർ റിലീസ് ചെയ്യാൻ പോകുന്ന പുതിയ തീയതി പ്രഖ്യാപിച്ചിരിക്കുകയാണ് നിർമ്മാതാവ് ആന്റണി പെരുമ്പാവൂർ. പുതിയ വർഷത്തിൽ മാർച്ച് 26 ആണ് ആണ് ആഗോള റിലീസ് ആയി മരക്കാർ എത്തുക എന്ന് അദ്ദേഹം ഒഫീഷ്യലായി തന്നെ തന്റെ സോഷ്യൽ മീഡിയ പേജിലൂടെ അറിയിച്ചു. പ്രിയദർശൻ സംവിധാനം ചെയ്ത ഈ ബ്രഹ്മാണ്ഡ ചിത്രത്തിൽ കംപ്ലീറ്റ് ആക്ടർ മോഹൻലാൽ ആണ് നായക വേഷം ചെയ്യുന്നത്. നൂറു കോടി രൂപ ബഡ്ജറ്റിൽ ഒരുക്കിയ ഈ ചിത്രം മലയാളം, തമിഴ്, ഹിന്ദി, തെലുങ്കു, കന്നഡ ഭാഷകളിൽ ആയി അറുപതോളം രാജ്യങ്ങളിൽ റിലീസ് ചെയ്യാൻ ആണ് തീരുമാനം.

രു മലയാള സിനിമയ്ക്കു കിട്ടുന്ന ഏറ്റവും വലിയ ആഗോള റിലീസ് ആയിരിക്കും മരക്കാർ നേടുക എന്നാണ് അറിയാൻ സാധിക്കുന്നത്. മോഹൻലാലിനൊപ്പം പ്രണവ് മോഹൻലാൽ, അർജുൻ സർജ, സുനിൽ ഷെട്ടി, പ്രഭു, അശോക് സെൽവൻ, കല്യാണി പ്രിയദർശൻ, കീർത്തി സുരേഷ്, മഞ്ജു വാര്യർ, നെടുമുടി വേണു, മുകേഷ്, ബാബുരാജ്, സുഹാസിനി, ഹരീഷ് പേരാടി, ഗണേഷ് കുമാർ, സന്തോഷ് കീഴാറ്റൂർ, മാമുക്കോയ, ഇന്നസെന്റ്, മണിക്കുട്ടൻ, നന്ദു, സുരേഷ് കൃഷ്ണ തുടങ്ങി ഒരു വലിയ താരനിര തന്നെ അണിനിരന്നിട്ടുള്ള മരക്കാരിനു വേണ്ടി പശ്ചാത്തല സംഗീതം ഒരുക്കിയത് രാഹുൽ രാജ്, ഗാനങ്ങൾ ഒരുക്കിയത് റോണി റാഫേൽ എന്നിവരാണ്. തിരു കാമറ ചലിപ്പിച്ച ഈ ചിത്രം എഡിറ്റ് ചെയ്തത് അയ്യപ്പൻ നായരാണ്.