തല അജിത്തിനെ പുകഴ്ത്തി ഗിന്നസ് പക്രു; അജിത് നല്ല മനസ്സുള്ള ഒരു മനുഷ്യൻ കൂടിയാണെന്ന് പക്രു..!

തമിഴ് സിനിമയിലെ ഏറ്റവും വലിയ താരങ്ങളിൽ ഒരാൾ ആണ് തല എന്ന് ആരാധകർ സ്നേഹത്തോടെ വിളിക്കുന്ന അജിത് കുമാർ. ഇന്ത്യയിലെ തന്നെ ഏറ്റവും കൂടുതൽ ആരാധകരുള്ള താരങ്ങളിൽ ഒരാളാണ് അജിത്. ഒരു സൂപ്പർ താരം എന്നതിലുപരി തന്റെ വിനയവും നന്മയുള്ള മനസ്സും കൊണ്ട് ഒരുപാട് ആരാധകരെ സൃഷ്ടിച്ചെടുത്തിട്ടുണ്ട് അജിത് എന്ന വ്യക്തി. ഒരിക്കൽ എങ്കിലും അദ്ദേഹത്തെ നേരിട്ട് കണ്ടിട്ടുള്ളവർ അല്ലെങ്കിൽ പരിചയപ്പെട്ടിട്ടുള്ളവർ എടുത്തു പറയുന്നതാണ് അജിത് എന്ന വ്യക്തിയുടെ വലിയ മനസ്സിനെ കുറിച്ച്. ഇപ്പോഴിതാ മലയാളത്തിന്റെ സ്വന്തം ഗിന്നസ് പക്രുവും തല അജിത്തിന്റെ ആ നല്ല മനസ്സിനെ കുറിച്ചുള്ള തന്റെ അനുഭവ സാക്ഷ്യം പങ്കു വെക്കുകയാണ്. ഫ്ലവർസ് ചാനലിലെ കോമഡി ഉത്സവം പരിപാടിയിൽ വെച്ചാണ് പക്രു അജിത്തിനെ കുറിച്ച് സംസാരിച്ചത്‌.

ആ പരിപാടിയിൽ പങ്കെടുക്കാൻ എത്തിയ ഒരു മത്സരാർത്ഥി അജിത്തിന്റെ ശബ്ദം ഗംഭീരമായി അവതരിപ്പിച്ചപ്പോൾ അയാളെ അനുമോദിച്ചു കൊണ്ട് സംസാരിച്ചപ്പോൾ ആണ് പക്രു അജിത്തിനെ കുറിച്ച് പറഞ്ഞത്. ഒരിക്കൽ ഒരു അവാർഡ് നൈറ്റിൽ വെച്ച് അജിത്തിനെ കണ്ടപ്പോൾ തനിക്കു അദ്ദേഹത്തോടൊപ്പം ഒരു ഫോട്ടോ എടുക്കണം എന്ന് ആഗ്രഹം തോന്നി എന്ന് പക്രു പറയുന്നു. ആ ആഗ്രഹം താൻ പ്രകടിപ്പിച്ചപ്പോൾ, തല അജിത് തന്റെ ഇരിപ്പിടത്തിൽ നിന്ന് എഴുന്നേറ്റു വന്നു തന്റെ മുന്നിൽ മുട്ട് കുത്തി നിന്നു ഫോട്ടോ എടുത്തു തന്നു എന്ന് പക്രു പറഞ്ഞു . വലിയ മനസ്സുള്ള, നല്ല മനസ്സുള്ള ഒരാൾക്ക് മാത്രമേ അതിനു സാധിക്കു എന്നും പക്രു പറയുന്നു. ഏതായാലും പക്രുവിന്റെ ഈ കമന്റ് അജിത് ആരാധകർ ഇപ്പോൾ ആഘോഷമാക്കുകയാണ്. പക്രു ഈ അഭിപ്രായം പറയുന്ന വീഡിയോ ഇപ്പോൾ സോഷ്യൽ മീഡിയയിൽ വൈറൽ ആയി മാറി കഴിഞ്ഞു.