പുത്തൻ റിലീസുകൾക്കിടയിലും സൂപ്പറായി വിജയും പൗർണ്ണമിയും; ഫാമിലി ഹിറ്റായി മാറി ജിസ് ജോയ്- ആസിഫ് അലി ചിത്രം..!

പുതിയ റിലീസുകൾ എത്തുമ്പോഴും പ്രേക്ഷക മനസ്സിൽ സൂപ്പറായി തന്നെ തുടരുകയാണ് ആസിഫ് അലി- ജിസ് ജോയ് ചിത്രമായ വിജയ് സൂപ്പറും പൗർണ്ണമിയും. പ്രദർശന വിജയത്തിന്റെ  മൂന്നു ആഴ്ചകൾ പിന്നിട്ട ഈ ചിത്രം നാലാം ആഴ്ചയിലും കുടുംബ പ്രേക്ഷകരുടെ പിന്തുണ നേടി ഒരു ഫാമിലി ഹിറ്റ് ആയി മാറി കഴിഞ്ഞു. ജിസ് ജോയ് തന്നെ രചനയും നിർവഹിച്ച ഈ ചിത്രം ഗംഭീര പ്രേക്ഷക പിന്തുണയും നിരൂപക പ്രശംസയും ആദ്യ ദിനം മുതൽ തന്നെ നേടിയെടുത്തിരുന്നു. കേരളത്തിന് പുറത്തു ഗൾഫ് രാജ്യങ്ങളിലും മികച്ച സ്വീകരണം ആണ് ഈ ചിത്രം നേടിയെടുത്തത്. ഐശ്വര്യ ലക്ഷ്മി ആസിഫ് അലിയുടെ നായികാ വേഷത്തിൽ എത്തിയ ഈ ചിത്രം ചിരിയും ചിന്തയും ഒരു സന്ദേശവും നൽകുന്ന ചിത്രമാണെന്ന് പറയാം.

ഒരു പക്കാ ഫാമിലി കോമഡി എന്റെർറ്റൈനെർ എന്ന രീതിയിൽ ഒരുക്കിയ വിജയ് സൂപ്പറും പൗർണ്ണമിയും നിർമ്മിച്ചത് ന്യൂ സൂര്യ ഫിലിമ്സിന്റെ ബാനറിൽ സുനിൽ എ കെ ആണ്. തുടർച്ചയായ രണ്ടാം വിജയമാണ് ഈ ചിത്രത്തിലൂടെ ആസിഫ് അലി- ജിസ് ജോയ് കൂട്ടുകെട്ട് നേടിയെടുത്തിരിക്കുന്നതു. ആസിഫ് അലിക്കും ഐശ്വര്യ ലക്ഷ്മിക്കും പുറമെ പ്രശസ്ത കലാകാരന്മാരായ സിദ്ദിഖ്, രഞ്ജി പണിക്കർ, ശാന്തി കൃഷ്ണ, ദേവൻ, കെ പി എ സി ലളിത, ബാലു വർഗീസ്, ജോസെഫ് അന്നംക്കുട്ടി , അജു വർഗീസ് എന്നിവരും ഈ ചിത്രത്തിന്റെ താര നിരയുടെ ഭാഗമായിട്ടുണ്ട്. ഇവരെല്ലാവരും തന്നെ മികച്ച പ്രകടനമാണ് കാഴ്ച വെച്ചിട്ടുള്ളതും. റെനഡിവേ കാമറ ചലിപ്പിച്ച ഈ ചിത്രത്തിന് സംഗീതം ഒരുക്കിയത് പ്രിൻസ് ജോര്ജും എഡിറ്റ് ചെയ്തത് രതീഷ് രാജുമാണ്.