ബ്രഹ്മാണ്ഡ ചിത്രം ആർ ആർ ആറിനൊപ്പം ഗായത്രി സുരേഷിന്റെ ത്രില്ലർ ചിത്രവും നാളെ റിലീസിന്..!

നാളെ റിലീസ് ആവുന്ന ബ്രഹ്മാണ്ഡ പാൻ ഇന്ത്യ ചിത്രം ആർ ആർ ആറിനൊപ്പം മത്സരിക്കാൻ മലയാളത്തിൽ നിന്ന് ഒരു കൊച്ചു ത്രില്ലർ കൂടി തയ്യാറെടുക്കുകയാണ്‌. ഗായത്രി സുരേഷ് പ്രധാന വേഷത്തിൽ എത്തുന്ന എസ്‌കേപ്പ് ആണ് ആ ത്രില്ലർ ചിത്രം. മലയാളത്തിലെ ആദ്യ സൈക്കോ ത്രില്ലർ ചിത്രം എന്ന ലേബലിൽ ആണ് എസ്‌കേപ്പ് പുറത്തു വരുന്നത്. നവാഗതനായ സർഷിക്ക് റോഷനാണ് ചിത്രം സംവിധാനം ചെയ്തിരിക്കുന്നത്. ഗായത്രി സുരേഷിനൊപ്പം ശ്രീവിദ്യ മുല്ലചേരിയാണ് ഈ ചിത്രത്തിലെ മറ്റൊരു പ്രധാന കഥാപാത്രത്തെ അവതരിപ്പിക്കുന്നത്. ഈ ചിത്രത്തിന്റെ തിരക്കഥ ഒരുക്കിയിരിക്കുന്നതും സംവിധായകനായ സർഷിക്ക് റോഷനാണ്. ഒരു രാത്രി അപ്രതീക്ഷിതമായി വീട്ടിൽ മുഖംമൂടി ധരിച്ചെത്തുന്ന സൈക്കോ കൊലയാളിയും അവിടെ അകപ്പെട്ടു പോവുന്ന ഗർഭിണിയും സുഹൃത്തും തുടര്‍ന്നുണ്ടാകുന്ന സംഭവവികാസങ്ങളുമാണ് ഈ ചിത്രത്തിലൂടെ പ്രേക്ഷകരുടെ മുന്നിലെത്തുക എന്നാണ് സൂചന.

ഗർഭിണിയുടെ വേഷത്തിൽ ആണ് ഗായത്രി സുരേഷ് എത്തുന്നത്. നേരത്തെ ഈ ചിത്രത്തിലെ ഒരു ഗാനവും ഗായത്രി പാടിയിരുന്നു. ജാസി ഗിഫ്റ്റിനൊപ്പം ഗായത്രി പാടിയ ആ ഗാനം മികച്ച ശ്രദ്ധയാണ് നേടിയത്. മേല്പറഞ്ഞവരെ കൂടാതെ അരുൺ കുമാറും സന്തോഷ് കീഴാറ്റൂരും നിർണ്ണായക വേഷങ്ങൾ ചെയ്യുന്ന ഈ ചിത്രത്തിൽ ഷാജു ശ്രീധർ, നന്ദൻ ഉണ്ണി, രമാ ദേവി, വിനോദ് കോവൂർ, ബാലൻ പാറക്കൽ, ദിനേശ് പണിക്കർ, രമേശ് വലിയശാല, സുധി കൊല്ലം, കൊല്ലം ഷാഫി എന്നിവരും അഭിനയിച്ചിട്ടുണ്ട്. പ്രശസ്ത ബോളിവുഡ് സിനിമാട്ടോഗ്രാഫർ സജീഷ് രാജ് കാമറ ചലിപ്പിച്ച ഈ ചിത്രത്തിന് സംഗീതം ഒരുക്കിയത് സാനന്ദ് ജോർജ് ഗ്രേസ്, എഡിറ്റ് ചെയ്തത് സന്ദീപ് നന്ദകുമാർ എന്നിവരാണ്.