ഗാനഗന്ധർവ്വനെ കാണാൻ കുടുംബ പ്രേക്ഷകരുടെ ഒഴുക്ക്; കലാസദൻ ഉല്ലാസിനെ ഏറ്റെടുത്തു മലയാളികൾ..!

മെഗാ സ്റ്റാർ മമ്മൂട്ടി നായകനായ പുതിയ ചിത്രമായഗാനഗന്ധർവ്വൻ കുടുംബ പ്രേക്ഷകരുടെ പിന്തുണയോടെ തീയേറ്ററുകൾ മികച്ച വിജയം നേടി മുന്നേറുകയാണ്. കലാസദൻ ഉല്ലാസ് എന്ന, ഗാനമേളയിൽ അടിച്ചു പൊളി പാട്ടുകൾ മാത്രം പാടുന്ന ഗായകന്റെ കഥ പറയുന്ന ഈ ചിത്രം സംവിധാനം ചെയ്തിരിക്കുന്നത് രമേശ് പിഷാരടി ആണ്. ഹാസ്യവും സസ്‌പെൻസും വൈകാരിക മുഹൂർത്തങ്ങളും ആവേശവും ട്വിസ്റ്റുകളും എല്ലാം കോർത്തിണക്കി തികഞ്ഞ ഒരു ഫാമിലി എന്റെർറ്റൈനെർ ആയാണ് ഈ ചിത്രം അദ്ദേഹം ഒരുക്കിയിരിക്കുന്നത്. രമേശ് പിഷാരടിയും ഹരി പി നായരും ചേർന്നൊരുക്കിയ തിരക്കഥയിൽ എല്ലാത്തരം പ്രേക്ഷകർക്ക് രസിക്കാനുള്ള വകയും ഉണ്ട് എന്ന് തന്നെ പറയാം. ആദ്യ ദിനം മുതൽ മികച്ച പ്രതികരണം നേടുന്ന ഈ ചിത്രം ബോക്സ് ഓഫീസിലും മികച്ച വിജയം തന്നെ കരസ്ഥമാക്കുന്ന കാഴ്ചയാണ് കാണാൻ സാധിക്കുന്നത്.

ഇച്ചായീസ് പ്രൊഡക്ഷന്സും രമേശ് പിഷാരടിയുടെ രമേശ് പിഷാരടി എന്റർടൈൻമെൻസ്റ്റും ചേർന്നാണ് ഈ ചിത്രം നിർമ്മിച്ചിരിക്കുന്നത്. മമ്മൂട്ടിയുടെ മികച്ച പ്രകടനമാണ് ഈ ചിത്രത്തിന്റെ ഹൈലൈറ്റ് എന്ന് പറയുമ്പോൾ തന്നെ, മനോജ് കെ ജയൻ, സുരേഷ് കൃഷ്ണ, റാഫി, മണിയൻ പിള്ള രാജു, മുകേഷ്, പുതുമുഖം വന്ദിത മനോഹരൻ എന്നിവരും കയ്യടി നേടി. ഇവർക്കൊപ്പം ഹാരിഷ് കണാരൻ, ധർമജൻ ബോൾഗാട്ടി, മോഹൻ ജോസ്, അശോകൻ, സുനിൽ സുഗത , പ്രചോദ് കലാഭവൻ, ജോണി ആന്റണി, ബൈജു എഴുപുന്ന, ദേവൻ എന്നിവരും ഈ ചിത്രത്തിന്റെ താര നിരയിൽ ഉണ്ട്. ദീപക് ദേവ് സംഗീതം ഒരുക്കിയ ഈ ചിത്രത്തിലെ ഗാനങ്ങൾ എല്ലാം തന്നെ പ്രേക്ഷക ശ്രദ്ധ നേടിയിട്ടുണ്ട്.