ചിരി ഉറപ്പു നൽകി ലവകുശ ടീം ; വമ്പൻ റിലീസുമായി നാളെ എത്തുന്നു

നാളെ കേരളത്തിൽ റിലീസ് ചെയ്യുന്ന ചിത്രം ആണ് ഗിരീഷ് സംവിധാനം ചെയ്ത ലവ കുശ. നീരജ് മാധവ് തിരക്കഥ ഒരുക്കിയ ഈ ചിത്രം നിർമ്മിച്ചിരിക്കുന്നത് ആർ ജെ ക്രീയേഷന്സിന്റെ ബാനറിൽ ജൈസൺ ഇളംകുളവും ഗിരീഷ് വൈക്കവും ചേർന്നാണ്. ബിജു മേനോൻ, നീരജ് മാധവ്, അജു വർഗീസ് എന്നിവർ പ്രധാന വേഷങ്ങളിൽ എത്തുന്ന ഈ ചിത്രത്തിലെ നായികാ വേഷം ചെയ്തിരിക്കുന്നത് ദീപ്തി സതി ആണ്.

ഒരു കമ്പ്ലീറ്റ് എന്റെർറ്റൈനെർ ആയാണ് ഈ ചിത്രം ഒരുക്കിയിരിക്കുന്നത്. കേരളത്തിലെ 125 ഓളം സ്‌ക്രീനുകളിൽ എത്തുന്ന ഈ ചിത്രത്തിന് വമ്പൻ പ്രതീക്ഷയാണ് പ്രേക്ഷകരുടെ ഇടയിൽ ഉള്ളത്. ചിത്രത്തിന്റെ ടീസറും അതിനു ശേഷം ഇറങ്ങിയ രണ്ടു ഗാനങ്ങളും ഇരു കയ്യും നീട്ടിയാണ് പ്രേക്ഷകർ സ്വീകരിച്ചത് എന്നുള്ളത് ഈ ചിത്രത്തിന് വേണ്ടി പ്രേക്ഷകർ ഏറെ കാത്തിരിക്കുന്നു എന്നതിന് തെളിവാണ്.

പ്രേക്ഷകരെ ഒരുപാട് ചിരിപ്പിക്കാൻ റെഡി ആയാണ് ഈ ചിത്രം എത്തുന്നത്. നീരജ് മാധവ്- അജു വർഗീസ് ടീം ഒരുക്കുന്ന തകർപ്പൻ കോമഡി രംഗങ്ങൾ ആണ് ഈ ചിത്രത്തിന്റെ പ്രത്യേകത. അജുവും നീരജ് മാധവും എപ്പോഴൊക്കെ ഒന്നിച്ചു വന്നിട്ടുണ്ടോ, അപ്പോഴൊക്കെ മികച്ച തമാശ രംഗങ്ങൾ നമ്മുക്ക് ലഭിച്ചിട്ടുണ്ട്.
ഈ ചിത്രത്തിലും ആ പതിവ് അവർ തെറ്റിച്ചിട്ടില്ല എന്നാണ് ലഭിക്കുന്ന സൂചനകൾ പറയുന്നത്. ഒപ്പം ബിജു മേനോനും കൂടി ചേരുമ്പോൾ ഒരു ചിരിപ്പൂരം തന്നെ നമ്മുക്ക് പ്രതീക്ഷിക്കാം.

അടി കപ്യാരെ കൂട്ടമണി, കുഞ്ഞി രാമായണം എന്നീ ചിത്രങ്ങളിൽ ഒക്കെ തകർത്തഭിനയിച്ച ടീം ആണ് നീരജ് മാധവ്- അജു വർഗീസ് കൂട്ടുകെട്ട്.