ഒരു തെക്കൻ തല്ല് കേസിലെ എന്തര് പാട്ട് വരുന്നു; റിലീസ് ചെയ്യാൻ മെഗാ സ്റ്റാർ മമ്മൂട്ടി

നവാഗതനായ ശ്രീജിത്ത് എൻ. സംവിധാനം ചെയ്ത ഒരു തെക്കൻ തല്ല് കേസ് എന്ന ചിത്രം ഇപ്പോൾ മലയാള സിനിമാ പ്രേമികൾ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നാണ്. ഈ വരുന്ന ഓണക്കാലത്ത് റിലീസ് ചെയ്യാൻ പോകുന്ന ഒരു തെക്കൻ തല്ല് കേസിന്റെ ടീസർ കുറച്ചു ദിവസങ്ങൾക്കു മുൻപ് വരികയും സൂപ്പർ ഹിറ്റായി മാറുകയും ചെയ്തിരുന്നു. ഇതിനോടകം പന്ത്രണ്ടു ലക്ഷത്തോളം കാഴ്ചക്കാരെയാണ് ഈ ടീസറിന് ലഭിച്ചത്. അതിനൊപ്പം തന്നെ ഇതിന്റെ പോസ്റ്ററുകളും സൂപ്പർ ഹിറ്റാണ്. പ്രേക്ഷകരുടെ പ്രിയതാരം ബിജു മേനോൻ നായകനായി എത്തുന്ന ഈ ചിത്രം, ജി.ആർ. ഇന്ദുഗോപൻ രചിച്ച അമ്മിണിപ്പിള്ള വെട്ടുകേസ് എന്ന പുസ്തകത്തെ അധികരിച്ചു കൊണ്ട് രാജേഷ് പിന്നാടനാണ്‌ രചിച്ചിരിക്കുന്നത്. ഇ ഫോർ എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്തയും സി.വി. സാരഥിയും, ന്യൂ സൂര്യ ഫിലിംസിന്റെ ബാനറിൽ സുനിൽ എ കെയും ചേർന്ന് നിർമ്മിച്ച ഈ ചിത്രം ഇവിടെ വിതരണം ചെയ്യുന്നതും ന്യൂ സൂര്യ ഫിലിംസാണ്. ഇപ്പോഴിതാ ഇതിലെ ആദ്യ ഗാനം റിലീസ് ചെയ്യാൻ പോവുകയാണ്.

എന്തര് പാട്ടെന്ന പേരിൽ പുറത്തു വരുന്ന ഈ ഗാനം നാളെ വൈകുന്നേരം ആറ് മണിക്ക് മെഗാ സ്റ്റാർ മമ്മൂട്ടിയാണ് തന്റെ സോഷ്യൽ മീഡിയ പേജുകളിലൂടെ റിലീസ് ചെയ്യുന്നത്. ബിജു മേനോനൊപ്പം , റോഷൻ മാത്യു, പത്മപ്രിയ, നിമിഷ സജയൻ എന്നിവരുൾപ്പെടെയുള്ള പ്രശസ്ത താരങ്ങൾ അണിനിരക്കുന്ന ഈ ചിത്രത്തിൽ അമ്മിണി എന്ന് വിളിപ്പേരുള്ള അമ്മിണിപ്പിള്ളയെന്ന കഥാപാത്രമായാണ് ബിജു മേനോൻ അഭിനയിച്ചിരിക്കുന്നത്. ഈ ചിത്രത്തിന് ക്യാമറ ചലിപ്പിച്ചത് മധു നീലകണ്ഠൻ, സംഗീതമൊരുക്കിയത് ജസ്റ്റിൻ വർഗീസ്, എഡിറ്റ് ചെയ്തത് മനോജ് കണ്ണോത് എന്നിവരാണ്. മേൽപ്പറഞ്ഞ അഭിനേതാക്കളെ കൂടാതെ, അഖിൽ കവലയൂർ, അശ്വത് ലാൽ, റിജു ശിവദാസ്, അരുൺ പാവുമ്പ, അസീസ് നെടുമങ്ങാട്, പ്രമോദ് വെളിയനാട്, പ്രശാന്ത് മുരളി, അച്യുതാന്ദൻ, ശശി വാളൂരാൻ, നീരജ രാജേന്ദ്രൻ, ജയരാജ് എന്നിവരും ഇതിന്റെ താരനിരയിലുണ്ട്.

ഫോട്ടോ കടപ്പാട്: NEK Photos