ആദ്യമായി ബിഗ് സ്‌ക്രീനിൽ സിനിമ കണ്ടു കുഞ്ചാക്കോ ബോബന്റെ മകൻ; വൈറൽ ആയി ഇസഹാക് ബോബൻ കുഞ്ചാക്കോയുടെ ചിത്രം

മലയാളത്തിന്റെ പ്രശസ്ത താരം കുഞ്ചാക്കോ ബോബനും ഭാര്യ പ്രിയക്കും ഒട്ടേറെ വർഷങ്ങൾ നീണ്ട കാത്തിരിപ്പിനു ഒടുവിൽ ആണ് ഒരു കുഞ്ഞു ജനിച്ചത്. ഇസഹാക്ക് ബോബൻ കുഞ്ചാക്കോ എന്നാണ് ഇവരുടെ മകന്റെ പേര്. കുട്ടിയുടെ ചിത്രങ്ങൾ നേരത്തെ തന്നെ സോഷ്യൽ മീഡിയയിൽ വൈറൽ ആയെങ്കിലും ഇപ്പോൾ ശ്രദ്ധ നേടുന്നത് ഇസഹാക്കിന്റെ ആദ്യത്തെ ബിഗ് സ്ക്രീൻ സിനിമ കാഴ്ച ആണ്. കുഞ്ചാക്കോ ബോബൻ നായകനായി എത്തിയ അഞ്ചാം പാതിരാ എന്ന ചിത്രമാണ് കുഞ്ഞു ഇസഹാക്കിന്റെ ആദ്യത്തെ ബിഗ് സ്ക്രീൻ സിനിമ കാഴ്ച. ഇസഹാക്ക് സിനിമ കാണാൻ തീയേറ്ററിലെ സീറ്റിൽ ഇരിക്കുന്ന ചിത്രം അഞ്ചാം പാതിരായിൽ പ്രധാന വേഷം ചെയ്ത നടി ഉണ്ണിമായ അടക്കം സോഷ്യൽ മീഡിയയിൽ പങ്കു വെച്ചിട്ടുണ്ട്.

പതിനാലു വർഷത്തിൽ അധികം നീണ്ട കാത്തിരിപ്പിനൊടുവിൽ കുഞ്ചാക്കോ ബോബന് ഒരു കുഞ്ഞു ജനിച്ചപ്പോൾ സിനിമാ ലോകം മുഴുവൻ ആശംസകളുമായി എത്തിയിരുന്നു. പ്രശസ്ത സംവിധായകൻ മിഥുൻ മാനുവൽ തോമസ് സംവിധാനം ചെയ്ത അഞ്ചാം പാതിരാ എന്ന ചിത്രം അതിഗംഭീര പ്രേക്ഷക പ്രതികരണം നേടിയാണ് ഇപ്പോൾ മുന്നേറുന്നത്. ഒരു ഇൻവെസ്റ്റിഗേഷൻ ത്രില്ലർ ആയി ഒരുക്കിയിരിക്കുന്ന ഈ ചിത്രം രചിച്ചതും മിഥുൻ തന്നെയാണ്. ആഷിക് ഉസ്മാൻ നിർമ്മിച്ച ഈ ചിത്രത്തിൽ ശ്രീനാഥ് ഭാസി, ഷറഫുദീൻ, ജിനു ജോസഫ്, ഹരികൃഷ്ണൻ, ഉണ്ണിമായ, രമ്യ നമ്പീശൻ, അഭിരാം, ജാഫർ ഇടുക്കി, മാത്യു തോമസ്, സുധീഷ് തുടങ്ങിയ ഒട്ടേറെ പ്രശസ്ത നടീനടന്മാർ അഭിനയിക്കുന്നുണ്ട്. ഈ വർഷത്തെ ആദ്യത്തെ ഹിറ്റായി മാറാൻ അഞ്ചാം പാതിരാക്കു സാധിച്ചു എന്ന് തന്നെ പറയാം.