ജോസഫ് അലക്സ് വീണ്ടും വരുമോ? ‘ദി കിംഗ്’ രണ്ടാം ഭാഗത്തെ കുറിച്ച് ഷാജി കൈലാസ്

ആക്ഷൻ, സ്റ്റൈൽ, മാസ് ഡയലോഗ് ചിത്രങ്ങളിലൂടെ പ്രേക്ഷകരെ പ്രകമ്പനം കൊള്ളിച്ച സംവിധായകനാണ് ഷാജി കൈലാസ്. സൂപ്പര്‍ താരങ്ങളെയും യുവതാരങ്ങളെയും നായകരാക്കി അദ്ദേഹം നിരവധി ഹിറ്റ് ചിത്രങ്ങൾ മലയാളത്തിന് സമ്മാനിച്ചിട്ടുണ്ട്. ഇവയിൽ എടുത്തുപറയേണ്ടവയാണ് മമ്മൂട്ടി- ഷാജി കൈലാസ് കൂട്ടുകെട്ടിൽ പിറന്ന ദി കിംഗ്, വല്യേട്ടന്‍ ഉൾപ്പെടെയുള്ള ചിത്രങ്ങൾ. തേവളളിപ്പറമ്പില്‍ ജോസഫ് അലക്‌സായുള്ള മമ്മൂട്ടിയുടെ കളക്ടർ വേഷം മലയാള സിനിമയിലെ എവർഗ്രീൻ മാസ് കഥാപാത്രമാണ്. മമ്മൂട്ടി എന്ന സൂപ്പര്‍ താരത്തിന്റെ മാര്‍ക്കറ്റ് വാല്യൂ ഉയര്‍ത്തിയ, പൊളിറ്റിക്കല്‍ ആക്ഷന്‍ ചിത്രം തിയേറ്ററുകളിലും ഗംഭീര പ്രതികരണം സ്വന്തമാക്കിയിരുന്നു. ജോസഫ് അലക്‌സ് ദി കിംഗ് ആൻഡ് കമ്മിഷണർ എന്ന ചിത്രത്തിലൂടെ പ്രേക്ഷകർക്ക് മുൻപിൽ എത്തിയെങ്കിലും, സിനിമ വിചാരിച്ചത്ര വിജയം നേടിയില്ല. എന്നാൽ ത്രസിപ്പിക്കുന്ന ഡയലോഗുമായി ദി കിംഗ് വീണ്ടും വരുമോ എന്നതിൽ സംവിധായകൻ ഷാജി കൈലാസ് തന്നെ വ്യക്തത നൽകിയിരിക്കുകയാണ്. ഒരു ഓൺലൈൻ മാധ്യമത്തിന് നൽകിയ അഭിമുഖത്തിലാണ് അദ്ദേഹം ഇക്കാര്യം വിശദീകരിച്ചത്.

ദി കിംഗ് വീണ്ടും ഉണ്ടാകുമോ എന്നത് ഇപ്പോൾ പറയാൻ സാധിക്കില്ലെന്നും, അത് എല്ലാവരും കൂടി തീരുമാനിക്കേണ്ടതാണെന്നും സംവിധായകൻ പറഞ്ഞു. ദി കിംഗിന്റെ തുടർച്ചയ്ക്ക് അനുയോജ്യമായ കഥ എഴുതിക്കിട്ടിയാൽ സിനിമയുടെ രണ്ടാം ഭാഗത്തിന് സാധ്യതയുണ്ടാകും എന്നും അദ്ദേഹം വ്യക്തമാക്കി. ഭീഷ്മ പർവ്വം പോലുള്ള സ്റ്റൈലിഷ് മാസ് ചിത്രങ്ങൾ കാണാനാണ് തനിക്ക് കൂടുതൽ ഇഷ്ടമെന്ന് ഒരിക്കൽ മമ്മൂട്ടിയോട് പറഞ്ഞപ്പോഴുള്ള അനുഭവവും സംവിധായകൻ വിവരിച്ചു. ‘ഞാനൊരു ആർട്ടിസ്റ്റാണ്, എനിക്ക് വ്യത്യസ്ത സിനിമകൾ ചെയ്യേണ്ടേ,’ എന്നായിരുന്നു മെഗാതാരം പറഞ്ഞതെന്നും ഷാജി കൈലാസ് പറഞ്ഞു.