ആരാധകർക്കിടയിൽ ആവേശമുയർത്തി എഡ്ഡി: ‘മാസ്റ്റര്‍പീസ്’ മേക്കിംഗ് വീഡിയോ പുറത്ത്

മമ്മൂട്ടി നായകനായി എത്തുന്ന അജയ് വാസുദേവ് ചിത്രം മാസ്റ്റര്‍പീസ് മേക്കിങ് വീഡിയോ പുറത്ത്.
മമ്മൂട്ടിയുടെ സംഘട്ടനരംഗങ്ങള്‍ ചിത്രീകരിക്കുന്നതിന്റെയും ലൊക്കേഷനിലേക്ക് എത്തുന്നതിന്റെയും മറ്റും ദൃശ്യങ്ങളടങ്ങുന്നതാണ് വീഡിയോ. മാസ്റ്റർ ഓഫ് മാസസ് എന്ന ടാഗ്‌ലൈനോടെ എത്തുന്ന ചിത്രത്തിന്റെ പ്രധാന ലൊക്കേഷൻ കൊല്ലം ഫാത്തിമ കോളജാണ്. മമ്മൂട്ടിയുടെ സൂപ്പര്‍ ആക്ഷന്‍ രംഗങ്ങൾ മേക്കിങ് വീഡിയോയിലും ഹൈലൈറ്റ് ചെയ്‌തിട്ടുണ്ട്‌.

മഴയത്തും മുന്‍പേയ്ക്ക് ശേഷം വീണ്ടും മമ്മൂട്ടി കോളേജ് പ്രൊഫസറായി വേഷമിടുന്ന ചിത്രമാണ് മാസ്റ്റര്‍പീസ്. കുഴപ്പക്കാരായ കൊളേജ് വിദ്യാർഥികൾ പഠിക്കുന്ന കൊളേജ് കാംപസിലേക്ക് അതിലേറെ കുഴപ്പക്കരാനായ പ്രൊഫസർ എത്തുമ്പോൾ ഉണ്ടാകുന്ന സംഭവവികാസങ്ങളാണ് ചിത്രത്തിന്റെ പ്രമേയം. സ്റ്റൈലിഷ് ഗെറ്റപ്പിൽ എഡ്വേര്‍ഡ് ലിവിംഗ്സ്റ്റണ്‍ എന്ന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്.

സന്തോഷ് പണ്ഡിറ്റും ചിത്രത്തിൽ ഒരു മുഴുനീള കഥാപാത്രത്തെ അവതരിപ്പിക്കുന്നുണ്ട്. ഉണ്ണി മുകുന്ദൻ, വരലക്ഷ്മി, പൂനം ബജ്‌വ ,ഗോകുൽസുരേഷ് ഗോപി, മഖ്ബൂൽ സൽമാൻ, മുകേഷ്, സിജു ജോൺ, പാഷാണം ഷാജി, ബിജു കുട്ടൻ, അർജുൻ, അശ്വിൻ, ജോഗി, ദിവ്യദർശൻ, അജ്മൽ നിയാസ്, കൈലാഷ്, കലാഭവൻ ഷാജോൺ, ഗണേഷ് കുമാർ, ക്യാപ്റ്റൻ രാജു, സുനിൽ സുഗദ, ശിവജി ഗുരുവായൂർ,മഹിമ നമ്പ്യാർ എന്നിങ്ങനെ വലിയൊരു താരനിര തന്നെ ചിത്രത്തിനായി അണിനിരക്കുന്നു. പുലിമുരുകന് ശേഷം ഉദയകൃഷ്ണ തിരക്കഥ ഒരുക്കുന്ന ചിത്രമാണിത്. വിനോദ് ഇല്ലംപള്ളിയാണ് ക്യാമറ കൈകാര്യം ചെയ്തത്. റോയല്‍ സിനിമാസിന്റെ ബാനറില്‍ സി.എച്ച്.മുഹമ്മദ് ആണ് ചിത്രത്തിന്റെ നിർമ്മാണം.