ഫഹദിന്റെ കാർബൺ പുതിയ പോസ്റ്റർ എത്തി; പ്രതീക്ഷ വർധിക്കുന്നു..!

ദയ, മുന്നറിയിപ്പ് എന്നീ ചിത്രങ്ങൾക്കു ശേഷം പ്രശസ്ത ക്യാമറാമാനും സംവിധായകനുമായ വേണു ഒരുക്കിയ ചിത്രമാണ് കാർബൺ. യുവ താരം ഫഹദ് ഫാസിൽ നായക വേഷത്തിൽ എത്തുന്ന ഈ ചിത്രം ഇപ്പോൾ അതിന്റെ പോസ്റ്റ്- പ്രൊഡക്ഷൻ സ്റ്റേജിൽ ആണ്. അടുത്ത വർഷം ജനുവരിയിൽ പ്രദർശനത്തിന് എത്തുമെന്ന് കരുതപ്പെടുന്ന ഈ ചിത്രത്തിന്റെ രണ്ടാമത്തെ പോസ്റ്റർ ഇന്ന് ഒഫീഷ്യൽ ആയി പുറത്തു വിട്ടു. സിനിമ പ്രേമികളും ആരാധകരും ഇരു കയ്യും നീട്ടിയാണ് ഈ പോസ്റ്ററും സ്വീകരിച്ചത്. ഫഹദ് ഫാസിൽ മാത്രമാണ് ഈ രണ്ടാമത്തെ പോസ്റ്ററിൽ ഉള്ളത്. ചിത്രത്തിന്റെ ആദ്യ പോസ്റ്റർ സോഷ്യൽ മീഡിയയിൽ തരംഗമായിരുന്നു. ചിത്രത്തിലെ പ്രധാന കഥാപാത്രങ്ങളെയെല്ലാം ഉൾക്കൊള്ളിച്ചു കൊണ്ടാണ് ആദ്യ പോസ്റ്റർ പുറത്തു വന്നത്.

മമത മോഹൻദാസ് ആണ് ഈ ചിത്രത്തിൽ നായികാ വേഷത്തിൽ അഭിനയിച്ചിരിക്കുന്നത്. ഫഹദിനും മമതക്കും ഒപ്പം ദിലീഷ് പോത്തൻ, മണികണ്ഠൻ ആചാരി, സൗബിൻ ഷാഹിർ, നെടുമുടി വേണു എന്നിവരും ഈ ചിത്രത്തിൽ നിർണ്ണായക വേഷങ്ങൾ അവതരിപ്പിച്ചിട്ടുണ്ട്. പോയട്രി ഫിലിം ഹൗസിന്റെ ബാനറിൽ സിബി തോട്ടുപുറം, നാവിസ് സേവ്യർ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിന് സംഗീത സംവിധാനം നിർവഹിച്ചിരിക്കുന്നത് ബോളിവുഡ് സംവിധായകനായ വിശാൽ ഭരദ്വാജ് ആണ്. ബോളിവുഡിൽ തന്നെയുള്ള മലയാളി ക്യാമറാമാൻ ആയ കെ യു മോഹനൻ ആണ് ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയത് എന്നത് പ്രേക്ഷക പ്രതീക്ഷ വർധിപ്പിക്കാൻ ഉള്ള ഒരു കാരണം ആണ്. മോഹൻ രാജ ഒരുക്കിയ തമിഴ് ചിത്രമായ വേലയ്ക്കാരൻ ആണ് ഉടൻ റിലീസ് ചെയ്യുന്ന ഫഹദ് ഫാസിൽ ചിത്രം.