കരിയറിലെ ഏറ്റവും വലിയ ചിത്രത്തിൽ ഫഹദ് ഫാസിൽ എത്തുന്നത് ഇങ്ങനെ ഒരു കഥാപാത്രമായി

ഫഹദ് ഫാസിലിന്റെ കരിയറിലെ ഏറ്റവും വലിയ ചിത്രമായി ഒരുങ്ങിയിരിക്കുന്ന സിനിമയാണ് ഒരു വലിയ ഇടവേളയ്ക്കു ശേഷം അൻവർ റഷീദ് ഒരുക്കിയ ട്രാൻസ്. അടുത്ത മാസം പതിനാലിന് ലോകം മുഴുവൻ റിലീസ് ചെയ്യാൻ പോകുന്ന ഈ ചിത്രം ഏകദേശം മുപ്പത്തിയഞ്ചു കോടി രൂപ ബഡ്ജറ്റിൽ ആണ് ഒരുക്കിയിരിക്കുന്നത്. ഇതിന്റെ പോസ്റ്ററുകൾ സോഷ്യൽ മീഡിയയുടെ ശ്രദ്ധ നേടിയെടുക്കുന്നുണ്ട്. എന്നാൽ എന്ത് കഥാപാത്രമായാണ് ഈ ചിത്രത്തിൽ ഫഹദ് അഭിനയിക്കുന്നത് എന്ന ചോദ്യം സോഷ്യൽ മീഡിയയിൽ മുഴങ്ങാൻ തുടങ്ങിയിട്ട് കുറേ നാളായി. ഇപ്പോൾ ലഭിക്കുന്ന റിപ്പോർട്ടുകൾ പ്രകാരം ഈ ചിത്രത്തിൽ ഒരു മോട്ടിവേഷൻ ട്രെയിനർ ആയാണ് ഫഹദ് ഫാസിൽ അഭിനയിക്കുന്നത്.

ഫഹദിന്റെ ഭാര്യ കൂടിയായ നസ്രിയ നസിം നായികാ വേഷം ചെയ്യുന്ന ഈ ചിത്രത്തിൽ ഒരു വലിയ താരനിര തന്നെ അണിനിരക്കുന്നുണ്ട്. അൻവർ റഷീദ് എന്റർടൈൻമെൻറ്സിന്റെ ബാനറിൽ അൻവർ റഷീദ് തന്നെ നിർമ്മാണവും നിർവഹിക്കുന്ന ഈ ചിത്രത്തിന് ഛായാഗ്രഹണം നിർവഹിച്ചത് അമൽ നീരദ് ആണ്. സംവിധായകൻ ഗൗതം മേനോൻ, വിനായകൻ, ശ്രീനാഥ് ഭാസി, ചെമ്പൻ വിനോദ്, ദിലീഷ് പോത്തൻ, അർജുൻ അശോകൻ, ജിനു ജോസഫ്, അശ്വതി മേനോൻ, ശ്രിന്ദ, ധർമജൻ ബോൾഗാട്ടി, അമാൽഡ ലിസ് എന്നിവരും അഭിനയിക്കുന്ന ഈ ചിത്രത്തിന്റെ തിരക്കഥയും സംഭാഷണങ്ങളും എഴുതിയിരിക്കുന്നത് വിൻസെന്റ് വടക്കൻ ആണ്. ഓസ്കാർ അവാർഡ് ജേതാവ് റസൂൽ പൂക്കുട്ടി ശബ്ദ മിശ്രണം നടത്തിയിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് പ്രവീൺ പ്രഭാകർ ആണ്. ജാക്സൺ വിജയൻ ഗാനങ്ങൾ ഒരുക്കിയ ട്രാൻസിനു പശ്ചാത്തല സംഗീതം ഒരുക്കിയിരിക്കുന്നത് സുഷിൻ ശ്യാം ആണ്.