കിടിലൻ മേക് ഓവറുമായി ആസിഫ് അലിയുടെ നായിക; കക്ഷി അമ്മിണി പിള്ള റിലീസിന് ഒരുങ്ങുന്നു..!

യുവ താരം ആസിഫ് അലി നായകനായി എത്തുന്ന പുതിയ ചിത്രമാണ് കക്ഷി അമ്മിണി പിള്ള. അടുത്ത മാസം റിലീസിന് ഒരുങ്ങുന്ന ഈ ചിത്രത്തിലൂടെ  ഷിബ്ല എന്ന മലപ്പുറംകാരി നായികാ വേഷത്തിൽ അരങ്ങേറുകയാണ്. കാന്തിയെന്ന പ്ലസ് സൈസ് നായികയെയാണ് ഷിബ്ല ഈ ചിത്രത്തിൽ അവതരിപ്പിക്കുന്നത്. ഇതിലെ കഥാപാത്രത്തിന്റെ പൂർണ്ണതക്കായി 20 കിലോ ആണ് തന്റെ ശരീര ഭാരം ഷിബ്ല വർധിപ്പിച്ചത്. ആറ് മാസം കൊണ്ട് ഇരുപതു കിലോ വർധിപ്പിച്ച ഈ നടി പിന്നീട് മൂന്നു മാസം കൊണ്ട് 15 കിലോ കുറക്കുകയും ചെയ്തു. കഥാപാത്രത്തെ കുറിച്ച് കേട്ട നിമിഷം മുതൽ തന്നെ താൻ ഏറെ ആവേശത്തിൽ ആയിരുന്നു എന്നും, അതുകൊണ്ടു തന്നെ എന്ത് ചെയ്തിട്ടാണെങ്കിലും ഈ കഥാപാത്രം നന്നാക്കണം എന്ന ആഗ്രഹം ഉണ്ടായിരുന്നു എന്നും  ഷിബ്ല പറയുന്നു.

ഓഡിഷനായി ഫോട്ടോ അയയ്ക്കുമ്പോള്‍ 65 കിലോയായിരുന്നു ശരീരഭാരം എന്നും പിന്നീട് തിരഞ്ഞെടുക്കപ്പെട്ടു എന്നറിഞ്ഞപ്പോൾ കുറ്റബോധമില്ലാതെ ഭക്ഷണം കഴിച്ചാണ് ശരീര ഭാരം വർധിപ്പിച്ചത് എന്നും പറയുന്നു ഈ നായിക. തലശ്ശേരിയിൽ ചിത്രത്തിന്റെ ആദ്യ ഷെഡ്യൂൾ തുടങ്ങിയപ്പോഴേക്കും കഥാപാത്രം ആവശ്യപ്പെട്ട ശരീര പ്രകൃതിയിലേക്ക് ഈ നടി എത്തിയിരുന്നു. ചിത്രത്തിന്റെ ഷൂട്ട് തീരുന്നതു വരെ ആ ശരീര ഭാരം നിലനിർത്തിയ നായിക പിന്നീട് ആണ് പതിനഞ്ചു കിലോയോളം കുറച്ചത്. നല്ല കഥാപാത്രങ്ങള്‍ ലഭിച്ചാല്‍ ശരീരഭാരം കൂട്ടാനോ കുറയ്ക്കാനോ ഇനിയും നൂറുവട്ടം സമ്മതമാണെന്നും ഈ നായിക പറയുന്നു. ആസിഫ് അലി വക്കീൽ വേഷത്തിൽ എത്തുന്ന ഈ ചിത്രം നവാഗതനായ  ദിന്‍ജിത്ത് അയ്യത്താന്‍ ആണ് സംവിധാനം ചെയ്തിരിക്കുന്നത്.