പിറന്നാൾ ദിനത്തിൽ ആവേശം തീർത്ത് ദുൽഖറിന്റെ മൂന്ന് ചിത്രങ്ങളുടെ ഫസ്റ്റ് ലുക്ക് പോസ്റ്ററുകൾ

ഇന്ന് മലയാളത്തിന്റെ യുവ താരം ദുൽകർ സൽമാൻ തന്റെ ജന്മദിനമാഘോഷിക്കുകയാണ്. തിരക്കുകളിൽ നിന്നു തിരക്കുകളിലേക്കു കുതിക്കുകയാണ് ദുൽകർ ഇപ്പോൾ. എന്നാൽ ജന്മദിനത്തിൽ തന്റെ ആരാധകർക്കായി ദുൽക്കറും ദുൽകർ ചിത്രങ്ങളുടെ അണിയറ പ്രവർത്തകരും ചേർന്ന് കരുതി വെച്ചത് ഒരു ഗംഭീര ട്രീറ്റ് തന്നെയാണ്. ഒരുപക്ഷെ ആദ്യമായാവും ഒരു നടന്റെ മൂന്നു സിനിമകളുടെ ഫസ്റ്റ് ലുക് പോസ്റ്ററുകൾ ഒരേ ദിവസം റിലീസ് ചെയ്യുന്നത്. അതും ആ താരത്തിന്റെ ജന്മദിനത്തിൽ. ഇതിലും മാസ്സ് ജന്മദിനാഘോഷം സ്വപ്നങ്ങളിൽ മാത്രം എന്ന് പറയേണ്ടി വരും. ദുൽകർ ആരാധകർ അക്ഷരാർത്ഥത്തിൽ എല്ലാം മറന്നു ആഘോഷിക്കുകയാണ് ഇപ്പോൾ . കാരണം, തങ്ങളുടെ താരത്തിന്റെ ഒന്നല്ല, രണ്ടല്ല, മൂന്നു കിടിലൻ ഫസ്റ്റ് ലുക് പോസ്റ്ററുകൾ ആണ് അവർക്കു കിട്ടിയിരിക്കുന്നത്.

ഒരു ഫസ്റ്റ് ലുക് പോസ്റ്റർ വന്നത് സൗബിൻ ഷാഹിറിന്റെ ആദ്യ സംവിധാന സംരംഭമായ പറവയിലേതാണ്. ഈ ചിത്രത്തിൽ ദുൽകർ നായകനല്ല, പക്ഷെ വളരെ പ്രധാനപ്പെട്ടൊരു കഥാപാത്രത്തെയാണ് അവതരിപ്പിക്കുന്നതെന്ന് ചിത്രത്തിന്റെ അണിയറ പ്രവർത്തകർ പറഞ്ഞു. ഈ ചിത്രത്തിന് വേണ്ടി ദുൽകർ ഒരു ഗാനവും ആലപിച്ചിട്ടുണ്ടെന്നാണ് വാർത്തകൾ വരുന്നത്. എന്തായാലും ഇതിലെ ഫസ്റ്റ് ലുക് പോസ്റ്റർ ഇതിനോടകം ഹിറ്റ് ആയി കഴിഞ്ഞു.

രണ്ടാമത്തെ ഫസ്റ്റ് ലുക്ക് പോസ്റ്റർ വന്നത് ബിജോയ് നമ്പ്യാർ സംവിധാനം ചെയ്ത മലയാളം- തമിഴ് ദ്വിഭാഷാ ചിത്രമായ സോളോയിലെ ആണ്. പ്രേക്ഷകർ ഒരുപാടു കാത്തിരിക്കുന്ന ഈ ചിത്രത്തിൽ ഒന്നിലധികം ഗെറ്റപ്പുകളിൽ ആണ് ദുൽകർ എത്തുന്നത്. ആ എല്ലാ ഗെറ്റപ്പുകളും കൂടി ചേർന്നുള്ള ഒരു ഫസ്റ്റ് ലുക് പോസ്റ്റർ ആണ് അണിയറ പ്രവർത്തകർ റിലീസ് ചെയ്തിരിക്കുന്നത്. പറവയും സോളോയും ഈ വരുന്ന സെപ്റ്റംബറിൽ തീയേറ്ററുകളിൽ എത്തുമെന്നാണ് സൂചനകൾ.

മൂന്നാമത്തെ ഫസ്റ്റ് ലുക്ക് പോസ്റ്റർ ദുൽകർ അഭിനയിക്കുന്ന തെലുങ്കു ചിത്രത്തിലേതാണ്. ദുൽകർ ജമിനി ഗണേശനായി വേഷമിടുന്ന ഈ ചിത്രം ഇതിഹാസ നടി സാവിത്രിയുടെ ജീവിത കഥയാണ് പറയുന്നത്. ഈ ചിത്രത്തിൽ ആണ് ദുൽകർ ഇപ്പോൾ അഭിനയിച്ചു കൊണ്ടിരിക്കുന്നത്.