താടി കറുപ്പിച്ച്‌ തുടങ്ങി, ഇങ്ങനെ പോയാൽ ഞാൻ അദ്ദേഹത്തിന്റെ അച്ഛനായി അഭിനയിക്കേണ്ടി വരും; മമ്മൂട്ടിയെ കുറിച്ച് ദുൽഖർ പറയുന്നു

മെഗാസ്റ്റാർ മമ്മൂട്ടിയുടെ പ്രായത്തെ വെല്ലുന്ന സൗന്ദര്യം എന്നും പ്രേക്ഷകർക്കും സിനിമാ പ്രവർത്തകർക്കും അത്ഭുതമാണ്. ഇത്രയും സൗന്ദര്യത്തോടെ ഈ എഴുപത്തിയൊന്നാം വയസ്സിലും എങ്ങനെയാണിരിക്കുന്നതെന്ന് പലപ്പോഴും പലരും അദ്ദേഹത്തോട് ചോദിക്കാറുമുണ്ട്. ഭക്ഷണ നിയന്ത്രണവും വ്യായാമവുമാണ് അതിന്റെ രഹസ്യമെന്നാണ് അദ്ദേഹത്തോട് അടുപ്പമുള്ളവർ പറയുന്നത്. ഏതായാലും ഇപ്പോൾ അദ്ദേഹത്തിന്റെ മകനും യുവ താരവുമായ ദുൽഖർ സൽമാനും അതുമായി ബന്ധപ്പെട്ട് സംസാരിച്ച കാര്യം ഏറെ ശ്രദ്ധ നേടുകയാണ്. ആർ. ബാൽകി സംവിധാനം ചെയ്ത പാ സിനിമയിൽ അഭിഷേക് ബച്ചൻ, അമിതാഭ് ബച്ചന്റെ അച്ഛനായി അഭിനയിച്ച പോലെ മമ്മൂട്ടിയുടെ അച്ഛനായി അഭിനയിക്കാനുള്ള ഓഫർ വന്നാൽ എന്തായിരിക്കും പ്രതികരണമെന്നാണ് ദുൽഖർ നേരിട്ട ചോദ്യം.

അതിനദ്ദേഹം പറഞ്ഞ ഉത്തരം, അതത്ര വിചിത്രമായ കാര്യമൊന്നുമല്ല എന്നും, തനിക്ക് ഇപ്പോഴേ പ്രായം അറിയാൻ തുടങ്ങി എന്നുമാണ്. തന്റെ നരച്ച താടി കറുപ്പിക്കാൻ താനിപ്പോഴേ മസ്കാര ഒക്കെ ഇട്ട് തുടങ്ങി എന്നും, ഇങ്ങനെ പോയാൽ അധികം വൈകാതെ തന്നെ, വലിയ മേക്കപ്പൊന്നും കൂടാതെ തന്നെ അദ്ദേഹത്തിന്റെ അച്ഛനായി അഭിനയിക്കേണ്ടി വരുമെന്നാണ് തോന്നുന്നതെന്ന് ദുൽഖർ പറയുന്നു. പ്രായമാകുന്നത് പ്രകടമാകാതിരിക്കാൻ അദ്ദേഹം എന്താണ് ചെയ്യുന്നതെന്ന് തനിക്കിപ്പോഴും അറിയില്ലെന്നും ദുൽഖർ പറഞ്ഞു. അദ്ദേഹത്തിന്റെ ഒരു ഫാൻ എന്ന നിലയിൽ ഒപ്പം അഭിനയിക്കാൻ തനിക്ക് ഏറെ ആഗ്രഹമുണ്ടെങ്കിലും, ആ കാര്യത്തിൽ അന്തിമ തീരുമാനം അദ്ദേഹത്തിന്റെ ആണെന്നും ദുൽഖർ വ്യക്തമാക്കി. തന്റെ കരിയറിനെ കുറിച്ച് അദ്ദേഹം അങ്ങനെ അഭിപ്രായങ്ങൾ ഒന്നും പറയാറില്ലെന്നും പക്ഷെ തന്റെ യാത്രയിൽ അദ്ദേഹം സന്തോഷവാനാണെന്നാണ് ഉമ്മയുമായി സംസാരിക്കുന്നതിൽ നിന്ന് തനിക്ക് മനസ്സിലായതെന്നും ദുൽഖർ പറയുന്നു. ആർ ബാൽകി ഒരുക്കിയ ചുപ് എന്ന ഹിന്ദി ചിത്രമാണ് ദുൽഖർ സൽമാന്റെ അടുത്ത റിലീസ്.