ദുൽഖറിന്റെ പുതിയ തമിഴ് ചിത്രം ആരംഭിക്കുന്നു..!

യുവ താരം ദുൽകർ സൽമാൻ നായകനായി അഭിനയിക്കുന്ന പുതിയ തമിഴ് ചിത്രം ഉടൻ ആരംഭിക്കുന്നു. ദേസിങ് പെരിയസാമി സംവിധാനം ചെയ്യുന്ന ഈ ചിത്രത്തിന്റെ പേര് കണ്ണും കണ്ണും കൊള്ളയ് അടിത്താൽ എന്നാണ്. സിദ്ധാർഥ് എന്ന് പേരുള്ള ഒരു ഐ ടി പ്രൊഫഷനലിനെയാണ് ദുൽകർ സൽമാൻ ഈ ചിത്രത്തിൽ അവതരിപ്പിക്കുക.

ഡൽഹിയിൽ ചിത്രീകരണം ആരംഭിക്കുന്ന ഈ ചിത്രത്തിൽ പെല്ലിച്ചുട് എന്ന തെലുങ്കു ചിത്രത്തിലൂടെ പ്രശസ്തയായ റിതു വർമയാണ് നായിക ആയി എത്തുന്നത്. . വിക്രമിനെ നായകനാക്കി ഗൗതം മേനോന്‍ സംവിധാനം ചെയ്യുന്ന ധ്രുവനച്ചത്തിരത്തിലെ നായികമാരില്‍ ഒരാളും കൂടിയാണ് റിതു വര്‍മ്മ. ഒരു റൊമാന്റിക് ത്രില്ലർ ആയാണ് ഈ ചിത്രം ഒരുക്കുന്നത് എന്നാണ് സൂചന.

വിജയ് മിൽട്ടന്റെ സംവിധാന സഹായി ആയിരുന്നു ഈ ചിത്രം ഒരുക്കുന്ന ദേസിങ് പെരിയ സാമി. വായ് മൂടി പേസുവോം, ഓകെ കണ്‍മണി, സോളോ എന്നിവയ്ക്ക് ശേഷം ദുല്‍ഖര്‍ നായകനായി എത്തുന്ന നാലാമത്തെ തമിഴ് ചിത്രമാണ് കണ്ണും കണ്ണും കൊള്ളൈ അടിത്താല്‍. ഡൽഹിക്കു പുറമെ ചെന്നൈ, ഗോവ, എന്നിവയാണ് ഈ ചിത്രത്തിന്റെ പ്രധാന ലൊക്കേഷനുകള്‍.

ദുൽകർ അഭിനയിച്ച തമിഴ് ചിത്രങ്ങളിൽ മണി രത്‌നം സംവിധാനം ചെയ്ത ഓക്കേ കണ്മണി ബോക്സ് ഓഫീസിൽ വൻ വിജയമാണ് നേടിയത്. ദുൽഖറിന്റെ അവസാന തമിഴ് ചിത്രമായ സോളോ ഒരുക്കിയത് ബിജോയ് നമ്പ്യാർ ആണ്. ഈ ചിത്രം പക്ഷെ ബോക്സ് ഓഫീസിൽ വലിയ ചലനങ്ങൾ സൃഷ്ടിച്ചില്ല. സോളോ ഒരു തമിഴ്- മലയാളം ദ്വിഭാഷാ ചിത്രം ആയിരുന്നു. ദുൽഖറിന്റെ ആദ്യ തമിഴ് ചിത്രമായ വായ് മൂടി പേസുവോം എന്ന ചിത്രവും സംസാരം ആരോഗ്യത്തിനു ഹാനികരം എന്ന പേരിൽ മലയാളത്തിൽ എത്തിയിരുന്നു.