ആദ്യ ഹിന്ദി ചിത്രത്തിന്റെ റിലീസിന് മുൻപ് മറ്റൊരു വമ്പൻ പ്രോജക്ടിൽ ദുൽഖർ

യുവതാരങ്ങള്‍ക്കിടയില്‍ ജനപ്രീതി കൂടുതലുള്ള നടനാണ് ദുൽഖർ സൽമാൻ. മലയാളത്തിന് പുറമെ ബോളിവുഡിലേക്കും ചുവടുവെച്ചിരിക്കുകയാണ് മലയാളികളുടെ സ്വന്തം കുഞ്ഞിക്ക. അഭിനേതാവും തിരക്കഥാകൃത്തുമായ ആകര്‍ഷ് ഖുറാന സംവിധാനം ചെയ്യുന്ന ‘കര്‍വാന്‍’ എന്ന ചിത്രത്തിലൂടെയാണ് ദുൽഖറിന്റെ ഹിന്ദി അരങ്ങേറ്റം. എന്നാൽ തന്റെ ആദ്യ ഹിന്ദി ചിത്രം റിലീസ് ചെയ്യുന്നതിന് മുൻപ് തന്നെ ദുല്‍ഖറിനെ തേടി മറ്റൊരു ബോളിവുഡ് ചിത്രം കൂടി ഒരുങ്ങുന്നതായാണ് സൂചന.

അനുരാഗ് കശ്യപിന്റെ അടുത്ത ചിത്രമായ മന്‍മരിസിയാനില്‍ ദുൽഖറും ഒരു പ്രധാനവേഷത്തിലെത്തുന്നുണ്ടെന്നാണ് പുറത്തുവരുന്ന റിപ്പോർട്ടുകൾ. ഒരു ത്രികോണ പ്രണയകഥയായായിരിക്കും ചിത്രത്തിന്റെ ഇതിവൃത്തം. ആനന്ദ് എല്‍ റായി നിര്‍മിക്കുന്ന ചിത്രത്തില്‍ തപ്സി പന്നുവും വിക്കി കൗശലും മുഖ്യകഥാപാത്രങ്ങളെ അവതരിപ്പിക്കുന്നു. ഏറെനാളായി നായകന് വേണ്ടിയുള്ള തിരച്ചിലിന് ശേഷമാണ് അണിയറപ്രവർത്തകർ ദുൽഖറിനെ കണ്ടെത്തിയിരിക്കുന്നത്. ചിത്രത്തിന്റെ ഷൂട്ടിങ് ജനുവരിയില്‍ ഹിമാചലില്‍ തുടങ്ങും.

രണ്ട് വര്‍ഷം മുന്‍പ് തന്നെ ആനന്ദ് എല്‍. റായി പ്രഖ്യാപിച്ച ഈ ചിത്രത്തിൽ സമീര്‍ ശര്‍മയെയായിരുന്നു സംവിധായകനായി നിശ്ചയിച്ചിരുന്നത്. ആയുഷ്മാന്‍ ഖുറാന, ഭൂമി പഡ്നേക്കര്‍ എന്നിരായിരുന്നു മുഖ്യ കഥാപാത്രങ്ങൾ. എന്നാൽ പിന്നീട് റായി തീരുമാനം ഉപേക്ഷിക്കുകയും തുടർന്ന് ഈ ചിത്രം അനുരാഗ് കശ്യപിന്റെ കൈകളിൽ എത്തുകയുമായിരുന്നു.

അതേസമയം ‘കർവാനി’ന്റെ റിലീസിന് വേണ്ടി കാത്തിരിക്കുകയാണ് ആരാധകർ ഇപ്പോൾ. ദുൽഖറിനോടൊപ്പം ഇര്‍ഫന്‍ ഖാന്‍, മിഥില പാര്‍ക്കര്‍ എന്നിവരാണ് ഈ ചിത്രത്തിലെ മുഖ്യ വേഷങ്ങൾ കൈകാര്യം ചെയ്‌തിരിക്കുന്നത്‌. ചിത്രം അടുത്തവർഷം റിലീസ് ചെയ്യുമെന്നാണ് പ്രതീക്ഷിക്കുന്നത്.