അത് പറയുമ്പോൾ കിട്ടിയൊരു അടുപ്പം വലുതായിരുന്നു; അനൂപ് സത്യനുമായുള്ള സൗഹൃദത്തെ കുറിച്ചു ദുൽഖർ

ദുൽഖർ സൽമാന്റെ ഈ വർഷം ഏറെ പ്രതീക്ഷയോടെ കാത്തിരിക്കുന്ന ചിത്രമാണ് വരനെ ആവശ്യമുണ്ട്. സത്യൻ അന്തിക്കാടിന്റെ മകനായ അനൂപ് സത്യനാണ് ചിത്രം സംവിധാനം ചെയ്തിരിക്കുന്നത്. സുരേഷ് ഗോപി, ശോഭന എന്നിവർ വമ്പൻ തിരിച്ചു വരവ് നടത്താൻ ഒരുങ്ങുന്ന ചിത്രം കൂടിയാണ് വരനെ ആവശ്യമുണ്ട്. പ്രിയദർശന്റെ മകളായ കല്യാണിയാണ് നായിക വേഷം കൈകാര്യം ചെയ്തിരിക്കുന്നത്. അടുത്തിടെ പുറത്തിറങ്ങിയ ട്രെയ്‌ലർ സമൂഹ മാധ്യമങ്ങളിൽ ഏറെ ശ്രദ്ധ നേടി കഴിഞ്ഞു. ദുൽഖർ ചിത്രമായ വിക്രമാദിത്യനിൽ ക്ലാപ്പ് ബോയായി അനൂപ് സത്യൻ വർക്ക് ചെയ്തിരുന്നു. അച്ഛനെ കുറിച്ചു പറയാതെയാണ് സെറ്റിൽ അദ്ദേഹം പ്രവർത്തിച്ചതെന്നും അനൂപ് ഒരു അഭിമുഖത്തിൽ പറയുകയുണ്ടായി.

വിക്രമാദിത്യൻ സിനിമയിൽ പ്രവർത്തിച്ച സമയത്ത് അനൂപ് നൽകിയ നിർദേശങ്ങളും അഭിപ്രായങ്ങളും ദുൽഖറിന് ഏറെ ഇഷ്ടപ്പെട്ടിരുന്നു. സീനുകളെ കുറിച്ചും അനൂപിനോട് ഇടയ്ക്കിടെ ചോദിക്കാറുണ്ടായിരുന്നു. നീ സത്യനങ്കിളിന്റെ മകനല്ലേയെന്നും എന്തുകൊണ്ട് നേരത്തെ പറഞ്ഞില്ല എന്നും ദുൽഖർ നേരിട്ട് അനൂപിനോട് ചോദിക്കുകയുണ്ടായി. അത് പറഞ്ഞതിന് ശേഷം കിട്ടിയ അടുപ്പം വലുതായിരുന്നു എന്ന് അനൂപ് സത്യൻ അഭിമുഖത്തിൽ വ്യക്തമാക്കി. സിനിമയിലെ പല സീനുകളും വീട്ടിലെ പോലെ തോന്നിയെന്നും അനൂപിന്റെ സംവിധാനത്തിൽ അഭിനയിച്ചപ്പോൾ പല തവണ ഉടക്കും വന്നിരുന്നു എന്ന് ദുൽഖർ ഒരു അഭിമുഖത്തിൽ സൂചിപ്പിച്ചിരിക്കുകയാണ്. ഉമ്മയ്ക്ക് അനു ആയിട്ട് ഉടക്കുമ്പോൾ വിഷമമാണെന്നും വീട്ടിലെ കുട്ടിയെ പോലെയാണ് അദ്ദേഹത്തെ കണക്കാകുന്നതെന്ന് ദുൽഖർ വ്യക്തമാക്കി. വെയ്ഫറർ ഫിലിംസിന്റെ ബാനറിൽ ദുൽഖർ സൽമാൻ നിർമ്മിക്കുന്ന വരനെ ആവശ്യമുണ്ട് ഫെബ്രുവരി 7ന് കേരളത്തിൽ പ്രദർശനത്തിനെത്തും.

ഫോട്ടോ കടപ്പാട്: Rishaj Mohammed