ദുൽഖർ സൽമാൻ വെബ് സീരിസിൽ അരങ്ങേറുന്നു; എത്തുന്നത് ബോളിവുഡിലെ വമ്പൻ ടീമിനൊപ്പം..!

മലയാള സിനിമയുടെ യുവതാരമായ ദുൽഖർ സൽമാൻ ഇപ്പോൾ മലയാളത്തിൽ മാത്രമല്ല, തമിഴ്, ഹിന്ദി, തെലുങ്കു ഭാഷകളിലും തിളങ്ങി നിൽക്കുന്ന താരമാണ്. മലയാളത്തിൽ റോഷൻ ആൻഡ്രൂസിന്റെ സല്യൂട്ട്, തമിഴിൽ ബ്രിന്ദ മാസ്റ്റർ ഒരുക്കിയ ഹേ സിനാമിക, ഹിന്ദിയിൽ ആർ ബാൽകി ഒരുക്കിയ ചുപ്, തെലുങ്കിൽ പേരിടാത്ത റൊമാന്റിക് ചിത്രം എന്നിവയാണ് ദുൽകർ അഭിനയിച്ചു ഇനി പുറത്തു വരാനുള്ളത്. അത്കൊണ്ട് തന്നെ ഒരു പാൻ ഇന്ത്യൻ സ്റ്റാർ എന്ന നിലയിൽ ദുൽഖർ വളരുകയാണ് എന്നതാണ് സത്യം. ആരാധകരും ഏറെ പ്രതീക്ഷയോടെയാണ് ഈ ചിത്രം കാത്തിരിക്കുന്നത്. ഇപ്പോഴിതാ മറ്റൊരു വമ്പൻ വാർത്തയാണ് ദുൽഖർ ആരാധകരെ തേടി എത്തിയിരിക്കുന്നത്. ദുൽഖർ സൽമാൻ വെബ് സീരിസിലും അരങ്ങേറ്റം കുറിക്കുകയാണ് എന്ന വാർത്തയാണ് വന്നിരിക്കുന്നത്. നെറ്റ്ഫ്ലിക്സിലാണ് ഈ വെബ് സീരിസ് വരിക എന്നും വാർത്തകൾ പറയുന്നു.

ആമസോൺ പ്രൈമിലെ സൂപ്പർ ഹിറ്റ് വെബ് സീരിസ് ആയ ഫാമിലി മാൻ ഒരുക്കിയ രാജ്- ഡി കെ ടീം ആണ് ഈ വെബ് സീരിസ് ഒരുക്കുന്നത്. സീരിസിന്റെ ചിത്രീകരണം നിലവിൽ ഡെറാഡൂണില്‍ പുരോഗമിക്കുകയാണ്. മാർച്ച് അവസാനത്തോടെ സീരിസിന്റെ ചിത്രീകരണം പൂർത്തിയാകും എന്നാണ് റിപ്പോർട്ടുകൾ പറയുന്നത്. ഒരു കോമഡി ത്രില്ലർ ആണ് ഈ സീരിസ് എന്നും, ബോളിവുഡ് താരങ്ങളായ രാജ്‌കുമാർ റാവു, ആദർശ് ഗൗരവ് എന്നിവരും ഇതിൽ അഭിനയിക്കുണ്ട് എന്നും റിപ്പോർട്ടുകൾ നമ്മളോട് പറയുന്നുണ്ട്. നേരത്തെ പ്രശസ്ത നടനായ ദില്‍ജിത്ത് ദോസാഞ്ചിനെയായിരുന്നു ഈ സീരിസിൽ ദുൽഖർ ചെയ്യുന്ന വേഷത്തിലേക്ക് ക്ഷണിച്ചത്. എന്നാൽ ദിൽജിത് ഡേറ്റ് ക്ലാഷുകൾ കാരണം പിന്മാറിയപ്പോഴാണ് ദുൽഖറിന് അവസരം ലഭിച്ചത്.