ദുൽഖർ സൽമാന്റെ തമിഴ് ചിത്രം ‘കണ്ണും കണ്ണും കൊള്ളയ് അടിത്താൽ ‘ ഒരുങ്ങുന്നത് ഒരു റോഡ് മൂവി ആയി..

മലയാളത്തിന്റെ യുവ താരം ദുൽഖർ സൽമാൻ നായകനായി അഭിനയിക്കുന്ന പുതിയ തമിഴ് ചിത്രമാണ് കണ്ണും കണ്ണും കൊള്ളയ് അടിത്താൽ. വിജയ് മിൽട്ടന്റെ സംവിധാന സഹായി ആയിരുന്ന ദേസിങ് പെരിയ സാമി ആദ്യമായി സംവിധാനം ചെയ്യുന്ന ഈ ചിത്രം ഒരു റൊമാന്റിക് ത്രില്ലർ എന്നതിനൊപ്പം ഒരു റോഡ് മൂവി കൂടി ആയാണ് ഒരുങ്ങുന്നത് എന്നാണ് സൂചന.

ഡൽഹി, ഗോവ, ചെന്നൈ എന്നിവിടങ്ങളിലൂടെ പ്രധാന കഥാപാത്രങ്ങൾ നടത്തുന്ന ഒരു യാത്രയാണ് ഈ ചിത്രത്തിന്റെ കഥാ പശ്ചാത്തലം എന്നാണ് ലഭിക്കുന്ന സൂചനകൾ പറയുന്നത്. ഇന്ന് ഡൽഹിയിൽ ചിത്രീകരണം ആരംഭിക്കുന്ന ഈ ചിത്രത്തിൽ റിതു വർമയാണ് നായിക. ഗൗതം മേനോൻ- വിക്രം ചിത്രമായ ധ്രുവനച്ചത്തിരത്തിലെ നായികമാരിൽ ഒരാളാണ് ഈ നടി.

മലയാളത്തിലും റോഡ് മൂവിയുടെ ഭാഗം ആയിട്ടുള്ള നടൻ ആണ് ദുൽകർ സൽമാൻ. ദുൽഖറിന്റെ നാലാമത്തെ തമിഴ് ചിത്രമാണ് കണ്ണും കണ്ണും കൊള്ളയ് അടിത്താൽ. ദുൽകർ സിദ്ധാർഥ് എന്ന കഥാപാത്രത്തെ അവതരിപ്പിക്കുന്ന ഈ ചിത്രത്തിൽ റൊമാന്സിനൊപ്പം ആക്ഷനും പ്രാധാന്യം ഉണ്ടെന്നാണ് റിപ്പോർട്ടുകൾ പറയുന്നത്.

മണി രത്‌നം ഒരുക്കിയ ഓക്കേ കണ്മണി എന്ന തമിഴ് ചിത്രത്തിന്റെ വിജയത്തിന് ശേഷം ദുൽകർ സൽമാന് തമിഴ് നാട്ടിലെ യുവാക്കൾക്കിടയിൽ മികച്ച സ്വീകാര്യതയാണ് ലഭിക്കുന്നത്. രാ കാർത്തിക് ഒരുക്കുന്ന മറ്റൊരു തമിഴ് ചിത്രം കൂടി ദുൽകർ ഉടനെ ചെയ്യും.

ദുൽകർ ഇപ്പോൾ പൂർത്തിയാക്കിയത് തെലുങ്കിലും തമിഴിലും ആയി ഒരുക്കുന്ന മഹാനദി എന്ന ചിത്രമാണ്. നടി സാവിത്രിയുടെ ജീവിത കഥ പറയുന്ന ഈ ചിത്രത്തിൽ ദുൽകർ അവതരിപ്പിച്ചത് ജമിനി ഗണേശന്റെ വേഷമാണ്.