ദുബായ്‌യുടെ മാനത്ത് കടുവയുടെ ഗർജനം; വീഡിയോ കാണാം

മലയാളത്തിന്റെ യുവ സൂപ്പർ താരം പൃഥ്വിരാജ് സുകുമാരൻ നായകനായി എത്തുന്ന ഏറ്റവും പുതിയ ചിത്രമാണ് കടുവ. ഷാജി കൈലാസ് സംവിധാനം ചെയ്ത ഈ മാസ്സ് മസാല എന്റെർറ്റൈനെർ രചിച്ചിരിക്കുന്നത് ജിനു എബ്രഹാമാണ്. ബ്ലോക്ക്ബസ്റ്റർ മോഹൻലാൽ ചിത്രം ലൂസിഫറിന് ശേഷം ബോളിവുഡ് താരം വിവേക് ഒബ്‌റോയ് വില്ലനായെത്തുന്ന ഈ ചിത്രത്തിലെ നായികാ വേഷം ചെയ്യുന്നത് സംയുക്ത മേനോൻ ആണ്. ഇപ്പോഴിതാ ഈ ചിത്രത്തിന്റെ ഗൾഫ് പ്രൊമോഷനാണ് സോഷ്യൽ മീഡിയയിൽ വൈറലായി മാറുന്നത്. ഡ്രോണ്‍ കൊണ്ടുള്ള ലൈറ്റ് ഷോയാണ് ദുബായുടെ ആകാശത്ത് കടുവക്കു വേണ്ടി ഒരുങ്ങിയത്. ആദ്യമായാണ് ഒരു മലയാള സിനിമയ്ക്കു വേണ്ടി ഇത്തരമൊരു പ്രമോഷൻ രീതി ഗൾഫിൽ നടന്നത്. ലൈറ്റ് കൊണ്ട് പൃഥ്വിരാജ് പ്രൊഡക്ഷന്‍സ്, മാജിക് ഫ്രെയിംസ്, കടുവ എന്നിങ്ങനെയാണ് ദുബായ്‌യുടെ ആകാശത്ത് എഴുതിയത്. അതോടൊപ്പം തന്നെ പൃഥ്വിരാജിന്റെ കഥാപാത്രമായ കടുവാക്കുന്നേല്‍ കുറുവച്ചന്റെ ചിത്രവും ആകാശത്ത് തിളങ്ങി നിന്നു.

പൃഥ്വിരാജ് പ്രൊഡക്ഷൻസ്, മാജിക് ഫ്രെയിംസ് എന്നിവയുടെ ബാനറിൽ പൃഥ്വിരാജ് സുകുമാരൻ, ലിസ്റ്റിൻ സ്റ്റീഫനെന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. ഏതായാലും ദുബായ് ആകാശത്ത് മലയാളത്തിന്റെ കടുവ മിന്നി തിളങ്ങുന്ന വീഡിയോ ഇപ്പോൾ സോഷ്യൽ മീഡിയയിൽ വൈറലാണ്. പൃഥ്വിരാജ്, വിവേക് ഒബ്‌റോയി, ലിസ്റ്റിന്‍ സ്റ്റീഫന്‍, സംയുക്ത മേനോന്‍ ഉള്‍പ്പെടെയുള്ളവര്‍ ഇതിനു സാക്ഷ്യം വഹിക്കാൻ ദുബായിൽ എത്തിയിരുന്നു. ഇന്നലെ രാത്രിയാണ് ഈ ലൈറ്റ് ഷോ കടുവക്കു വേണ്ടി അവിടെ വെച്ച് നടത്തിയത്. ജൂലൈ ഏഴിന് റിലീസ് ചെയ്യാൻ പോകുന്ന ഈ ചിത്രം വലിയ പ്രതീക്ഷകളോടെയാണ് ആരാധകരും സിനിമാ പ്രേമികളും കാത്തിരിക്കുന്നത്.