ലോകത്തു ഏറ്റവും കൂടുതൽ ആളുകൾ കണ്ട വെബ് സീരിസ്/സിനിമകളുടെ ലിസ്റ്റ് പുറത്തു; രണ്ടാം സ്ഥാനം നേടി ദൃശ്യം 2 ..!

ഈ കഴിഞ്ഞ ഫെബ്രുവരി പതിനെട്ടിന് ആണ് കംപ്ലീറ്റ് ആക്ടർ മോഹൻലാൽ നായകനായ ദൃശ്യം 2 എന്ന ചിത്രം റിലീസ് ചെയ്തത്. ആമസോൺ പ്രൈം റിലീസ് ആയി എത്തിയ ഈ ചിത്രം ഇന്ത്യക്കു അകത്തു നിന്നും പുറത്തു നിന്നും അതിഗംഭീര പ്രശംസയാണ് നേടിയെടുത്തത്. ലോക സിനിമയിലെ തന്നെ ഏറ്റവും മികച രണ്ടാം ഭാഗങ്ങളുടെ ലിസ്റ്റിലാണ് പ്രേക്ഷകരും നിരൂപകരും ഈ ചിത്രത്തെ ചേർത്ത് വെച്ചത്. ഇതിലെ ഗംഭീര പ്രകടനത്തിന് മോഹൻലാൽ വലിയ കയ്യടി നേടിയപ്പോൾ ഈ ചിത്രം രചിച്ചു സംവിധാനം ചെയ്ത ജീത്തു ജോസഫിനും അഭിനന്ദന പ്രവാഹമായിരുന്നു. ആമസോൺ പ്രൈമിൽ ഏറ്റവും കൂടുതൽ ആളുകൾ കണ്ട മലയാള ചിത്രം എന്ന റെക്കോർഡ് മോഹൻലാൽ നായകനായ ലൂസിഫറിന് ആയിരുന്നു എങ്കിൽ ആ റെക്കോർഡ് തകർത്ത ദൃശ്യം 2 ലോകത്തു തന്നെ ഈ അടുത്തകാലത്ത് ഏറ്റവും കൂടുതൽ പ്രേക്ഷകർ കണ്ട വെബ് സീരിസ്/ സിനിമകളുടെ ലിസ്റ്റിലും മുകളിൽ എത്തി. വോഗ് ഇന്ത്യ മാഗസിൻ പുറത്തു വിട്ട ഈ ലിസ്റ്റിൽ രണ്ടാം സ്ഥാനത്തു ആണ് ദൃശ്യം 2 ഇടം പിടിച്ചത്. ഫെബ്രുവരിയിൽ ഏറ്റവും കൂടുതൽ ആളുകൾ കണ്ട വെബ് സീരിസ് നെറ്റ്ഫ്ലിക്സിൽ വന്ന റ്റു ഓൾ ദി ബോയ്സ് എന്ന വെബ് സീരിസ് ആണ്.

ദൃശ്യം 2 രണ്ടാം സ്ഥാനത്തു എത്തിച്ചേർന്നപ്പോൾ പിന്നീട് ഈ ലിസ്റ്റിൽ ഇടം പിടിച്ച വെബ് സീരിസ്/ സിനിമകൾ, ഐ കെയർ എ ലോട്ട്(നെറ്റ്ഫ്ലിക്സ്), മാൽകം ആൻഡ് മേരി (നെറ്റ്ഫ്ലിക്സ്), ദി ഗേൾ ഓൺ ദി ട്രെയിൻ (നെറ്റ്ഫ്ലിക്സ്), സ്പേസ് സ്വീപ്പർസ് (നെറ്റ്ഫ്ലിക്സ്), ദി ബിഗ് ഡേ (നെറ്റ്ഫ്ലിക്സ്), ബ്ലിസ് (ആമസോൺ), 1962 (ഡിസ്‌നി+ ഹോട്ട് സ്റ്റാർ), ഫയർ ഫ്ലൈ ലേൻ (നെറ്റ്ഫ്ലിക്സ്), ബിഹൈൻഡ് ഹേർ ഐസ് (നെറ്റ്ഫ്ലിക്സ്) എന്നിവയാണ്. ആദ്യ പതിനൊന്നിൽ എട്ടും നെറ്റ്ഫ്ലിക്സിൽ നിന്നായപ്പോൾ രണ്ടെണ്ണം ആമസോണിൽ നിന്നും ഒരെണ്ണം ഡിസ്‌നി+ ഹോട്ട് സ്റ്റാറിൽ നിന്നുമാണ്. ഏതായാലും ആഗോള ഡിജിറ്റൽ പ്ലാറ്റ്‌ഫോമിലും ഒരു മലയാള ചിത്രം വെന്നിക്കൊടി പാറിക്കുന്ന അഭൂതപൂർവമായ കാഴ്ചയാണ് ഇപ്പോൾ കാണാൻ സാധിക്കുന്നത്.