എന്റെ ഭാവി മക്കളുടെ അമ്മയുടെ കയ്യിലിരിക്കുന്ന കുഞ്ഞിന്റെ അമ്മയ്ക്ക്; വിഘ്‌നേശ് ശിവന്റെ കുറിപ്പ് വൈറലാവുന്നു..!

പ്രശസ്ത തമിഴ് സംവിധായകൻ വിഘ്‌നേശ് ശിവൻ കഴിഞ്ഞ ദിവസം മാതൃ ദിനത്തിൽ പങ്കു വെച്ച കുറിപ്പാണു ഇപ്പോൾ സോഷ്യൽ മീഡിയയിൽ നിറയുന്നത്. തമിഴകത്തിന്റെ ലേഡി സൂപ്പർ സ്റ്റാർ നയൻ താരയുമായി ഏറെ കാലമായി പ്രണയത്തിലാണ് വിഘ്‌നേശ് ശിവൻ. അദ്ദേഹം സംവിധാനം ചെയ്ത നാനും റൗഡി താൻ എന്ന വിജയ് സേതുപതി ചിത്രത്തിൽ നയൻ താരയായിരുന്നു നായികാ വേഷം ചെയ്തത്. ആ ചിത്രത്തിന്റെ സെറ്റിൽ വെച്ചാണ് ഇരുവരും പ്രണയത്തിലായത്. ഏതായാലും ഇരുവരുടെയും പ്രണയം തെന്നിന്ത്യൻ സിനിമാ ലോകത്ത് പരസ്യമായ രഹസ്യമാണ്. കഴിഞ്ഞ ദിവസം വിഘ്‌നേശ് ശിവൻ ഇട്ട രണ്ടു പോസ്റ്റുകളാണ് ശ്രദ്ധ നേടുന്നത്. അതിൽ ഒന്നു നയൻ താരയുടെ അമ്മയെ കുറിച്ചാണ് എങ്കിൽ മറ്റൊന്ന് നയൻ താരയെ കുറിച്ചാണ്.

മാതൃദിനാശംസകൾ മിസിസ് കുര്യൻ. ഈ സുന്ദരിക്കുട്ടിയെ നന്നായി വളർത്തി നിങ്ങൾ. ഞങ്ങൾ നിങ്ങളെ ഒരുപാട് സ്നേഹിക്കുന്നു അമ്മേ. നന്ദി അമ്മു. ഈ വാക്കുകളോടെ നയൻ താരയുടെ അമ്മയുടെയും നയൻ താരയുടെയും ഫോട്ടോകൾ പങ്കു വെച്ച വിഘ്‌നേശ് ശിവൻ, നയൻ താര ഒരു കുഞ്ഞുമായി നിൽക്കുന്ന ഫോട്ടോ പങ്കു വെച്ചു കൊണ്ട് കുറിച്ചിരിക്കുന്നത്, ഭാവിയിൽ എനിക്കുണ്ടാകാൻ പോകുന്ന കുഞ്ഞുങ്ങളുടെ അമ്മയുടെ കൈയിലുള്ള കുഞ്ഞിന്റെ അമ്മയ്ക്ക് മാതൃദിനാശംസകൾ എന്നാണ്. ഇരുവരും തമ്മിലുള്ള വിവാഹം ഈ വർഷം ഉണ്ടാകുമെന്നാണ് ആരാധകർ പ്രതീക്ഷിക്കുന്നത്. കൈ നിറയെ വമ്പൻ ചിത്രങ്ങളുമായി നയൻ താര തിരക്കിലാണെങ്കിൽ തന്റെ പുതിയ ചിത്രത്തിന്റെ പണിപ്പുരയിലാണ് വിഘ്‌നേശ് ശിവൻ. സൂര്യ നായകനായ താനാ സെർന്ത കൂട്ടം ആയിരുന്നു വിഘ്‌നേശ് ശിവന്റെ തൊട്ടു മുൻപത്തെ ചിത്രം.