തെലുങ്ക് ചിത്രം മഹാനദിയിൽ ദുൽഖർ അഭിനയിച്ച ആദ്യ രംഗത്തെക്കുറിച്ച് സംവിധായകന്‍ പറയുന്നു

ദുൽഖറിന്റെ ആദ്യതെലുങ്ക് ചിത്രമായ ‘മഹാനദി’ യുടെ ഫസ്റ്റ്ലുക്ക് പോസ്റ്റർ കഴിഞ്ഞ ദിവസം പുറത്തിറങ്ങിയിരുന്നു. പ്രമുഖ തമിഴ് ചലച്ചിത്ര താരമായിരുന്ന ജെമിനി ഗണേശനായാണ് ദുൽഖർ ചിത്രത്തിൽ വേഷമിടുന്നത്. യെവഡേ സുബ്രഹ്മണ്യം’ എന്ന ചിത്രമൊരുക്കിയ നാഗ് അശ്വിനാണ് ചിത്രത്തിന്റെ സംവിധാനം. ഒരു പ്രമുഖ പത്രത്തിന് നൽകിയ അഭിമുഖത്തിൽ ദുൽഖറിന്റെ അഭിനയത്തെക്കുറിച്ച് നാഗ് അശ്വിൻ പരാമർശിക്കുകയുണ്ടായി. ഒരു പ്രോജക്ടിന്റെ വിപണിമൂല്യം മാത്രം നോക്കാതെ സിനിമയുടെ ആത്മാവ് കൂടി പരിഗണിക്കുന്ന നടനാണ് ദുല്‍ഖറെന്നും അദ്ദേഹം കൂട്ടിച്ചേർത്തു.

തനിക്ക് പരിചയമില്ലാത്ത ഭാഷയും , പോയകാലം ചിത്രീകരിക്കുന്ന സിനിമയുമായതിനാല്‍ ഏറെ സൂക്ഷ്മതയോടെയാണ് ദുല്‍ഖര്‍ ചിത്രത്തിൽ അഭിനയിച്ചത്. രാജേന്ദ്ര പ്രസാദിനൊപ്പമുള്ള ഒരു ഡയലോഗ് സീക്വന്‍സാണ് ‘മഹാനദി’യില്‍ ദുല്‍ഖറിന്റേതായി ആദ്യം ചിത്രീകരിച്ചത്. അദ്ദേഹമത് ഒറ്റ ടേക്കില്‍ ഓക്കെയാക്കി. ദുൽഖറിന്റെ അഭിനയം ആദ്യമായി കാണുന്നവരായിരുന്നു സെറ്റിൽ ഉണ്ടായിരുന്ന ഭൂരിഭാഗം ആളുകളും. എന്നിട്ടും കട്ട് പറഞ്ഞയുടനെ എല്ലാവരും അദ്ദേഹത്തെ അഭിനന്ദിച്ചു കൈയ്യടിക്കാൻ തുടങ്ങിയിരുന്നു.

നടിയും ജെമിനി ഗണേശന്റെ ഭാര്യയുമായിരുന്ന സാവിത്രിയുടെ ജീവിതകഥ പറയുന്ന സിനിമയാണ് ‘മഹാനദി’. ജെമിനി ഗണേശന്റെ ഭാര്യ സാവിത്രിയുടെ വേഷത്തില്‍ എത്തുന്നത് കീര്‍ത്തി സുരേഷ് ആണ്. ചിത്രത്തിന്റെ ആദ്യ ഷെഡ്യൂള്‍ ഈ മാസം തുടക്കത്തില്‍ പൂര്‍ത്തിയായി. രണ്ടാം ഷെഡ്യൂള്‍ ഓഗസ്റ്റില്‍ ആരംഭിക്കും.