ദിലീപ്- ബി ഉണ്ണികൃഷ്ണൻ ചിത്രം കോടതി സമക്ഷം ബാലൻ വക്കീൽ റിലീസ് തിയതി പ്രഖ്യാപിച്ചു…!!

ജനപ്രിയ നായകൻ ദിലീപിനെ നായകനാക്കി ബി ഉണ്ണികൃഷ്ണൻ സംവിധാനം ചെയ്ത ചിത്രമാണ് കോടതി സമക്ഷം ബാലൻ വക്കീൽ. ഒരു കോമഡി ത്രില്ലെർ ആയി ഒരുക്കുന്ന ഈ ചിത്രത്തിന്റെ റിലീസ് ഡേറ്റ് ഇപ്പോൾ ഉറപ്പിച്ചു കഴിഞ്ഞു. അടുത്ത വർഷം ഫെബ്രുവരി 21 നു ആണ് ഇപ്പോൾ ഈ ചിത്രം റിലീസ് ചെയ്യാൻ തീരുമാനിച്ചിരിക്കുന്നത്. ബോളിവുഡ്  പ്രൊഡക്ഷൻ കമ്പനിയായ വയാകോം മോഷൻ പിക്ചേഴ്സ് നിർമ്മിക്കുന്ന ഈ ചിത്രം കേരളത്തിൽ വിതരണം ചെയ്യുന്നത് ബി ഉണ്ണികൃഷ്ണന്റെ നിർമ്മാണ -വിതരണ ബാനർ ആയ ആർ ഡി ഇല്ല്യൂമിനേഷൻ ആയിരിക്കും. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത് കഴിഞ്ഞ ഒക്ടോബറിൽ ദിലീപിന്റെ ജന്മദിനത്തിൽ ആണ്.

ഇതിന്റെ ആദ്യ ടീസർ എത്താൻ പോകുന്നത് വരുന്ന ക്രിസ്മസ് ദിനത്തിൽ ആണ്. വിക്കുള്ള ഒരു വക്കീൽ ആയാണ് ദിലീപ് ഈ ചിത്രത്തിൽ അഭിനയിക്കുന്നത് എന്നാണ് സൂചന. ആലപ്പുഴ, എറണാകുളം എന്നിവിടങ്ങളിലായി ചിത്രീകരണം പൂർത്തിയായ ഈ ചിത്രത്തെ കുറിച്ചുള്ള കൂടുതൽ വിവരങ്ങൾ വരും ദിവസങ്ങളിൽ പുറത്തു വരും. പ്രിയ ആനന്ദും മമത മോഹൻദാസും ആണ് ഈ ചിത്രത്തിലെ നായികാ വേഷങ്ങൾ ചെയ്യുന്നത് എന്നാണ് സൂചനകൾ പറയുന്നത്. ബാഹുബലിയിൽ കാലകേയൻ ആയി അഭിനയിച്ച പ്രഭാകർ ഈ ചിത്രത്തിൽ ഉണ്ടെന്നാണ് റിപ്പോർട്ടുകൾ പറയുന്നത്. പാസഞ്ചർ എന്ന ചിത്രത്തിന് ശേഷം ദിലീപ് വക്കീൽ ആയി എത്തുന്ന ചിത്രമാണ് ഇത്. മോഹൻലാൽ നായകനായ വില്ലൻ ആണ് ബി ഉണ്ണികൃഷ്ണന്റേതായി അവസാനം റിലീസ് ചെയ്ത ചിത്രം. സമ്മിശ്ര പ്രതികരണം നേടിയ ഈ ചിത്രം ബോക്സ് ഓഫീസിൽ വിജയം നേടിയിരുന്നു.